គណៈមេធាវីនៃព្រះរាជាណាចក្រកម្ពុជា បានរៀបចំធ្វើជាម្ចាស់ផ្ទះ រៀបចំសន្និសីទអន្តរជាតិលើកទី១ ស្តីពីការផ្តល់ជំនួយផ្នែកច្បាប់ ដោយមានការចូលរួមពីមេធាវីអន្តរជាតិ ដែលមកពី១៣ប្រទេស ភាគីពាក់ពន្ធ័ជាតិ និង អន្តរជាតិ មកពីក្រសួងយុត្តិធម៌ ក្រសួងកិច្ចការនារី ក្រសួងសេដ្ឋកិច្ច និងហិរញ្ញវត្ថុ ក្រុមប្រឹក្សាជាតិកម្ពុជាដើម្បីស្រ្តី សរុបប្រមាណ១០០០នាក់។ សន្និសីទនេះរៀបចំឡើងក្រោមប្រធានបទ“ការចែករំលែកឧត្តមានុវត្តន៍ដើម្បីផ្តល់ជំនួយផ្នែកច្បាប់កាន់តែមានប្រសិទ្ធិភាពនៅអាស៊ី”។
ឯកឧត្តម លី ចន្ទ័តុលា ប្រធានគណៈមេធាវីនៃព្រះរាជាណាចក្រកម្ពុជា បានមានប្រសាសន៍បញ្ជាក់ថា នេះគឺជាមោទកភាពសម្រាប់កម្ពុជាក្នុងការដឹកនាំរៀបចំសន្និសីទអន្តរជាតិលើកទី១ ដែលមានការចូលរួមពីសំណាក់មេធាវីអន្តរជាតិរហូតដល់ ១៣ប្រទេស ក្នុងគោលបំណងដើម្បីលើកកម្ពស់ការយល់ដឹង អំពីសារៈសំខាន់នៃការផ្តល់ជំនួយផ្នែកច្បាប់ ដែលជាកត្តាចម្បងមួយនៃសង្គម ប្រកបដោយសន្តិភាព យុត្តិធម៌ សុខដុមរមនា និង ចីរភាព ។ យន្តការនេះនឹងបង្កើតបានជាថ្នាលសម្រាប់ការពិភាក្សាក្នុងចំណោមតួអង្គពាក់ពន្ធ័នៅក្នុងការផ្តល់ជំនួយផ្នែកច្បាប់ ដើម្បីបង្កើនកិច្ចសហប្រតិបត្តិការកាន់តែជិតស្និទ និង ច្រើនឡើង។ ចែករំលែកឧត្តមានុវត្តន៍ពីតាមបណ្តាយុត្តាធិការ និង វិស័យពាក់ពន្ធ័ដើម្បីការផ្តល់ជំនួយផ្នែកច្បាប់កាន់តែមានប្រសិទ្ធិភាព និង ជាការរួមចំណែកដល់កិច្ចខិតខំប្រឹងប្រែងកម្រិតជាតិ និង អន្តរជាតិ ក្នុងការផ្តល់ជំនួយផ្នែកច្បាប់កាន់តែប្រសើរឡើង។
ឯកឧត្តម ប្រធានគណៈមេធាវីបានបញ្ជាក់ទៀតថា ជំនួយផ្នែកច្បាប់បានចូលរួមចំណែកយ៉ាងសំខាន់ដើម្បីសម្រេចបានគោលដៅសាកលលោកនៃសិទ្ធិទទួលបានយុត្តិធម៌ដែលមានជាមូលដ្ឋានមួយ នៃគោលដៅអភិវឌ្ឍន៍ប្រកបដោយចីរភាពទាំង១៧ របស់អង្គការសហប្រជាជាតិ។ ក្នុងរយៈពេល៥ឆ្នាំកន្លងមក នេះគណៈមេធាវីនៃព្រះរាជាណាចក្រកម្ពុជា បានទទួល និង គ្រប់គ្រងការពារសំណុំរឿង២៧៦៩៨សំណុំរឿង ។ កូនក្តីដែលពាក់ព័ន្ធមានចំនួន៤៤៣០៨នាក់ ក្នុងនោះមានកូនក្តីជាជនបរទេសមកពី៣៦ប្រទេស មានចំនួន១៦១៧នាក់ ។ មេធាវីនៃព្រះរាជាណាចក្រកម្ពុជា បានផ្តល់ប្រឹក្សាយោបល់ផ្នែកច្បាប់បានចំនួន ២៦១៦ករណី ដែលមានមេធាវីស្ម័គ្រចិត្ត ចូលរួមមានចំនួន៦៤៧នាក់ ។ គណៈមេធាវីបានចំណាយថវិកាផ្ទាល់ខ្លួនចំនួនប្រមាណ៣ពាន់លានរៀល។
សូមបញ្ជាក់ថា ជំនួយផ្នែកច្បាប់គឺជាសេវាចាំបាច់ដែលជួយដល់ជនក្រីក្រនិងជនងាយរងគ្រោះ ដែលពុំមានលទ្ធភាពក្នុងការពឹងពាក់សេវាផ្នែកច្បាប់ដើម្បីស្វែងរកយុត្តិធម៌។ ជំនួយផ្នែកច្បាប់គឺគ្របដណ្តប់លើករណីរដ្ឋប្បវេណី ព្រហ្មទណ្ឌ រដ្ឋបាល រួមទាំងការអប់រំផ្នែកច្បាប់ ការទទួលបានព័ត៌មានច្បាប់ និងសេវាផ្សេងៗទៀត តាមរយៈយន្តការដោះស្រាយវិវាទក្រៅប្រព័ន្ធតុលាការ។ ជំនួយនេះរួមចំណែកដល់សង្គមដែលប្រកបដោយ សន្តិភាព យុត្តិធម៌ សុខុមដុមរមនា និង បរិយាបន្ន ផ្នែកលើនីតិរដ្ឋ និង សិទ្ធិមនុស្ស។ បន្ថែមលើពីនេះជំនួយផ្នែកច្បាប់ ក៏រួមចំណែកក្នុងការសន្សំសំចៃការចំណាយរបស់រាជរដ្ឋាភិបាលលើបញ្ហាដែលពុំបានដោះស្រាយ ដូចជាសេវាសុខភាព ការស្នាក់នៅ ការការពារកុមារ និង ការឃុំឃាំង៕ អត្ថបទ សូដាវណ្ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
