ប្រជាពលរដ្ឋរងគ្រោះដោយគ្រោះធម្មជាតិកាលពីថ្ងៃទី៦ខែឧសភាកន្លងទៅចំនួន៩៩គ្រួសារ នៅ​ភូមិ​ធម្មជាតិរុនតាឯក សង្កាត់រុនតាឯក ក្រុងរុនតាឯកតេជោសែន បានទទួល​បាន​អំណោយ​ពី​សាខា​កាក​បាទក្រហម ខេត្តសៀមរាប។ការផ្ដល់អំណោយនេះ ធ្វើឡើងកាលពីថ្ងៃទី១២ខែឧសភា ឆ្នាំ​២០២៤ ស្ថិតនៅបរិវេន ផ្សាររុនតាឯក ក្រុងរុនតាឯកតេជោសែន ខេត្ដសៀមរាប។

លោកជំទាវ ទុយ ជិ ប្រាក់សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជា ខេត្ត​សៀមរាប មានប្រសាសន៍ក្នុងពេលអញ្ជើញជួបសំណេះសំណាល សួរ​សុខ​ទុក្ខ​ប្រជា​ពលរដ្ឋ​រង​គ្រោះ​ដោយខ្យលកន្ត្រាក់នោះថា ប្រជាពលរដ្ឋចំនួន៩៩គ្រួសារ(ក្នុងនោះ រលំចំនួន២៤ខ្នង និង​របើក​ដំបូល​ចំនួន៧៤ខ្នង)។លោកជំទាវបានចូលរួមសោកស្ដាយ ចំពោះ​ប្រជាពលរដ្ឋ​ដែល​ទទួល​នវការ​រង​គ្រោះដោយខ្យល់កន្ត្រាក់ បានបណ្ដលឱ្យខូចខាតផ្ទះសំបែង និងទ្រព្យ​សម្បត្តិ​ខ្លះ​ផង​ដែរ​។​ ក្នុងឱកាសនោះលោកជំទាវ បានពាំនាំនូវការផ្ដាំផ្ញើសួរសុខទុក្ខពីសំណាក់ សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ប្រាក់ សោភ័ណ ដែល​លោកជាប់ភារកិច្ចមិនបានចុះសួរសុខទុក្ខផ្ទាល់ ប៉ុន្ដែជានិច្ចកាលកាកកបានក្រហម បាន​យក​ចិត្ត​ទុក​ដាក់ខ្ពស់ ចំពោះសុខទុក្ខ លោកយាយ លោកតា អ៊ំពូមីង បងប្អូនប្រជាពលរដ្ឋរងគ្រោះ និង​ងាយរងគ្រោះគ្រប់រូប ដោយមិនប្រកាន់ វណ្ណៈ ពណ៌សម្បុរ ជំនឿសាសនា ឬនិន្នា​ការ​នយោបាយ​ណាមួ​យឡើយ។ លោកជំទាវបន្តថា បន្ទាប់ពីទទួលបានព័ត៌មានេះ ឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានចាត់​ក្រុម​ការងារ ដើម្បីចុះពិនិត្យជាបន្តបន្ទាប់ និងរៀបចំអំណោយមនុស្សធម៌ជូនបងប្អូន នាពេលនេះ​។ លោក​ជំទាវ​អនុប្រធាន ក៏បានអំពាវនាវដែលបង ប្អូនប្រជាពលរដ្ឋទាំងអស់ សូមមេត្តារួមគ្នា ដាំ​ដើម​ឈើ​ឱ្យបានច្រើន ដើម្បីបានជារបាំងការពារខ្យល់ បានជាម្លប់ និងជម្រកទៅថ្ងៃអនាគត់។ លើសពីនេះ លោកជំទាវ ក៏សូមសំណូមពរចំពោះបងប្អូនប្រជាពលរដ្ឋ ដែលមាន​បំណង​សង់​លំ​នៅដ្ឋាន សូមគិតគូរឱ្យបានហ្មត់ចត់អំពីភាពមាំទាំរបស់ផ្ទះ។ គួររៀបចំធ្វើគ្រឹះផ្ទះឱ្យមាំ ស្រប​តាម​ទំហំ​ផ្ទះ​ធំ ព្រោះកាលណាគ្រឹះមាំ វាអាចយជួយទប់លំនឹង ព្រមទាំងការពារខ្យល់ ឬឧបទ្ទវ​ហេតុ​ផ្សេង​ៗ​ផងដែររ។ជាមួយគ្នានោះ លោកជំទាវអនុប្រធាន ក៏បានផ្ដាំផ្ញើដល់ប្រជាពលរដ្ឋទាំងអស់ សូម​មេត្តាថែទាំសុខភាពឱ្យបានល្អ ពិសេសកូនចៅតូចៗត្រូវប្រុងប្រយ័ត្ន ខ្លាច​ក្រែង​ជួប​វិបត្តិ​ផ្សេង​ៗ ព្រោះដើមរដូវវស្សាជិតមកដល់ហើយ ម្យ៉ាងវិញទៀត បើឃើ​ញ​ស​ភាព​មិន​ស្រួល​ត្រូវ​ប្រញាប់​ទៅ​មណ្ឌល​សុខភាព ឬមន្ទីរពេលដែលនៅជិតបំផុត ដើម្បីអាចពិគ្រោះ ឬព្យាបាល​បាន​ទាន់​ពេល​វេលា​។ សូមបញ្ជាក់ថា អំណោយមនុស្សធម៌បានផ្ដល់ជូនរងគ្រោះដោយគ្រោះធម្មជាតិ រួមមាន មុង ភួយ សារុងក្រមា កន្ទេល អង្ករ ថវិកា ព្រមទាំងគ្រឿងឧបភោគ បរិភោគជាច្រើនទៀត៕