បាល់ទាត់៖ ក្រុមបាល់ទាត់ស្ត្រីកាណាដាបានឈានដល់វគ្គផ្ដាច់ព្រ័ត្រ ដណ្ដើមមេដាយមាសអូឡាំពិកទីក្រុងតូក្យូហើយ ក្រោយយកឈ្នះក្រុមបាល់ទាត់ស្ត្រីជើងឯកពិភពលោកអាមេរិក ១-០ វគ្គពាក់កណ្តាលផ្ដាច់ព្រ័ត្រនៅកីឡដ្ឋាន Kashima។
កីឡាការិនី Jessie Fleming គឺជាអ្នកស៊ុតបញ្ចូលទីគ្រាប់ជ័យជំនះតែ ១គ្រាប់គត់ដោយបាល់ពិន័យ ១១ម៉ែត្រនៅនាទីទី៧៥ បន្ទាប់ពីកីឡាការិនីបំរុងរបស់អាមេរិក Deanne Rose ធ្វើឱ្យមានកំហុសលើកីឡាការិនីកាណាដា Tierna Davidson នៅក្នុងប្រអប់គ្រោះថ្នាក់។ នេះជាព្រឹត្តិការណ៍អូឡាំពិកអូឡាំពិក ២លើកជាប់គ្នាហើយដែលអាមេរិកខកខានឡើងវគ្គផ្តាច់ព្រ័ត្រ។ ចំណែកក្រុមកាណាដានៅពេលនេះ នឹងឡើងជួបជាមួយស៊ុយអែតនៅវគ្គផ្តាច់ព្រ័ត្រ ដណ្តើមមេដាយមាសនៅថ្ងៃសុក្រនេះ។ ក្រុមស៊ុយអែតបានយកឈ្នះអូស្ត្រាលី ១-០ ផងដែរនៅវគ្គពាក់កណ្តាលផ្តាច់ព្រ័ត្រម្សិលមិញនៅកីឡដ្ឋាន Yokohama ដែលមួយគ្រាប់ជ័យជំនះនោះសំរេចបានដោយកីឡាការិនី Fridorina Rolfo នៅនាទីទី៤៦។
ដោយឡែកសំរាប់អាមេរិក និងអូស្ត្រាលីនឹងត្រូវជួបគ្នានៅថ្ងៃព្រហស្បតិ៍នេះ ដើម្បីដណ្តើមមេដាយសំរឹទ្ធ។ នេះជាការឈានឡើងវគ្គផ្តាច់ព្រ័ត្រ ២លើកជាប់គ្នាសំរាប់ស៊ុយអែត បន្ទាប់ពីឡើងវគ្គផ្តាច់ព្រ័ត្រនៅអូឡាំពិកទីក្រុង Rio ប្រទេសប្រេស៊ីលកាលពីឆ្នាំ២០១៦ តែចាញ់អាល្លឺម៉ង់នៅវគ្គផ្តាច់ព្រ័ត្រ។ រំលឹកថា តាំងពីបង្កើតវិញ្ញសាកីឡាបាល់ទាត់ស្ត្រីនៅអូឡាំពិកដំបូងតាំងពីឆ្នាំ១៩៩៦ មានតែអាមេរិកដែលឈ្នះមេដាយមាសអូឡាំពិក បានច្រើនជាងគេដល់ទៅ ៤លើកក្រៅពីនោះមាន ណ័រវេយ ១លើក និងអាល្លឺម៉ង់ ១លើក៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
