អ្នកនាំពាក្យរបស់ឆ្មាំល្បាតឆ្នេរហ្វីលីពីន (PCG) បាននិយាយនៅថ្ងៃចន្ទ (១៣ ឧសភា) នេះថាអង្គភាពខ្លួនប្តេជ្ញារក្សាវត្តមាននៅក្នុងតំបន់ជម្លោះនៃសមុទ្រចិនខាងត្បូង ដើម្បីធានាថាប្រទេសចិន មិនអាចអនុវត្តសកម្មភាពអះអាងសិទ្ធិឡើងវិញនៅដែនទឹក សាប៊ីណា ស្ហូល (Sabina Shoal)។

ឆ្មាំល្បាតឆ្នេរហ្វីលីពីន បាននិយាយកាលពីថ្ងៃសៅរ៍ថា ខ្លួនបានដាក់ពង្រាយនាវាទៅកាន់ថ្មប៉ប្រះទឹក សាប៊ីណា ស្ហូល ដែលទីក្រុងម៉ានីលហៅថា អេស្កូដា (Escoda) ជាទីដែលខ្លួនបានចោទប្រកាន់ប្រទេសចិន ថាបានសាងសង់កោះសិប្បនិម្មិតមួយ ស្របពេលមានជម្លោះដែនសមុទ្រកើនឡើង។

អ្នកនាំពាក្យ លោក ជេយ តារៀលឡា (Jay Tarriela) បានប្រាប់សន្និសីទសារព័ត៌មានថា ឆ្មាំល្បាតឆ្នេរសមុទ្រត្រូវតែធ្វើឱ្យប្រាកដថា ខ្លួនអាចរារាំង «ប្រទេសចិន ពីការអនុវត្តការអះអាងឡើងវិញដោយជោគជ័យនៅដែនទឹក សាប៊ីណា ស្ហូល»។

ដោយស្ថិតនៅក្នុងតំបន់សេដ្ឋកិច្ចផ្តាច់មុខរបស់ប្រទេសហ្វីលីពីន ថ្មប៉ប្រះទឹកនេះគឺជាចំណុចប៉ះទង្គិចគ្នាសម្រាប់នាវាដែលបំពេញបេសកកម្មផ្គត់ផ្គង់ឡើងវិញដល់កងទ័ពហ្វីលីពីន ឈរជើងលើនាវាចម្បាំងដែលមានមូលដ្ឋាននៅដែនទឹក សេខិន ថូម៉ាស ស្ហូល (Second Thomas Shoal) ជាទីដែលទីក្រុងម៉ានីល និងចិន មានការប្រឈមមុខដែនសមុទ្រជាញឹកញាប់។

ប្រទេសចិន បានអនុវត្តការទាមទារសិទ្ធិឡើងវិញយ៉ាងទូលំទូលាយនៅលើកោះមួយចំនួននៅសមុទ្រចិនខាងត្បូង ការសាងសង់កងកម្លាំងអាកាស និងកន្លែងយោធាផ្សេងទៀត ដែលបង្កឱ្យមានការព្រួយបារម្ភនៅក្នុងទីក្រុងវ៉ាស៊ីនតោន និងជុំវិញតំបន់សមុទ្រនោះ៕