ភ្នំពេញ៖ ក្រសួងបរិស្ថាន និងអង្គការសហប្រជាជាតិ (UN) បានពិភាក្សា និងបានចែករំលែកបទពិសោធន៍ការសាងសង់សំណង់អគារ ដោយមិនប្រើប្រាស់ថាមពលច្រើន និងជួយកាត់បន្ថយកម្ដៅ ស្របពេលពិភពលោកកំពុងមានការព្រួយបារម្ភ ពីបញ្ហាការប្រែប្រួលអាកាសធាតុ ។

ក្នុងកម្មវិធីប្រជុំស្តីពី ការអនុវត្តន៍ជាសហគមន៍ សម្រាប់យុទ្ធសាស្ត្រប្រព័ន្ធត្រជាក់អកម្ម សម្រាប់ការអភិវឌ្ឍន៍ប្រកបដោយចីរភាពនៅកម្ពុជា (Passive Cooling Strategies Community of Practice inaugural Meeting) នៅថ្ងៃទី១៣ ខែឧសភា ឆ្នាំ២០២៤ មន្ត្រី UN ESCAP និងមន្ត្រី UN environment programme លើកឡើងថា កិច្ចពិភាក្សានេះ ធ្វើយ៉ាងណាក្នុងការស្វែងរកដំណោះស្រាយមួយ ដើម្បីរចនាម៉ូតផ្ទះ ឬសំណង់អគារផ្សេងៗ ដែលជួយកាត់បន្ថយប្រើប្រាស់ថាមពល ជួយឲ្យមានលំហូរខ្យល់បរិសុទ្ធ លំហូរខ្យល់ធម្មជាតិ មិនប្រើប្រាស់នូវម៉ាស៊ីនត្រជាក់ច្រើន ហើយគម្រោងនេះ ក៏ជាការឆ្លើយតបទៅនឹងការកើនឡើងកម្ដៅលើពិភពលោក ។

ពួកគេបន្តថា ពាក់ព័ន្ធនឹងការងារនេះ ក៏បានបង្កើតនូវសហគមន៍មួយ ដែលប្រមូលផ្ដុំនូវស្ថាបត្យករជំនាញមកពីតាមសាលា ក្រុមហ៊ុន និងក្រសួងស្ថាប័នពាក់ព័ន្ធ ដើម្បីចែករំលែកបទពិសោធន៍ដល់គ្នា ហើយរំពឹងថាកម្ពុជាជាប្រទេសដំបូង ដែលនឹងអនុវត្តន៍ការងារនេះបានច្រើនជាងគេ ។

ចំណែកអ្នកចូលរួមទាំងខ្មែរ និងបរទេស បានបង្ហាញនូវការគាំទ្រ ចំពោះគម្រោងនេះ 

ហើយសម្រាប់ការសាងសង់ផ្ទះ ដើម្បីឲ្យមានភាពត្រជាក់ដល់បរិស្ថាននេះ កម្ពុជាយើងគឺបានធ្វើតាំងពីជំនាន់បុរាណមកម្ល៉េះ ដែលម៉ូតផ្ទះជាច្រើន បានជួយកាត់បន្ថយកម្ដៅ ។

គួរបញ្ជាក់ថា កម្មវីធីនេះ មានគោលបំណងដើម្បីចែករំលែកចំណេះដឹង ការរៀនសូត្រ និងកិច្ចសហប្រតិបត្តិការ ក្នុងការដាក់បញ្ចូលនូវយុទ្ធសាស្ត្រប្រព័ន្ធត្រជាក់អកម្ម (Passive Cooling) ទៅក្នុងការអនុវត្តការរចនាស្ថាបត្យកម្ម និងការរៀបចំទីក្រុង ដោយផ្តោតលើការផ្តល់ភាពងាយស្រួល ដល់អ្នកសាងសង កាត់បន្ថយតម្រូវការប្រព័ន្ធត្រជាក់នៅក្នុងអគារ រួមទាំងប្រយុទ្ធប្រឆាំង កំដៅក្នុងទីក្រុង និងជាយុទ្ធសាស្ត្រប្រព័ន្ធអកម្មត្រជាក់នៅកម្ពុជា ដែលមានគោលដៅក្នុងការកាត់បន្ថយតម្រូវការថាមពល និងការកាត់បន្ថយបញ្ចេញឧស្ម័នផ្ទះកញ្ចក់ តាមរយៈវិធីសាស្ត្រត្រជាក់អកម្មក្នុងសំណងអាគារ ។ 

គម្រោងនេះ ដឹកនាំដោយក្រសួងបរិស្ថាន សហការជាដៃគូដោយវិទ្យាស្ថានបច្ចេកវិទ្យាកម្ពុជា (ITC) គាំទ្រការអនុវត្តពីអង្គការសហប្រជាជាតិសេដ្ឋកិច្ច និងគណៈកម្មការសង្គមសម្រាប់អាស៊ី និងប៉ាស៊ីហ្វិក (ESCAP) និងបរិស្ថានអង្គការសហប្រជាជាតិកម្មវិធី (UNEP) ៕

អត្ថបទ ៖ បាន សុខរិទ្ធិ