នៅឯសន្និសីទកិច្ចសន្ទនាអ៊ីរ៉ង់-អារ៉ាប់ នៅទីក្រុងតេអេរ៉ង់ កាលពីថ្ងៃអាទិត្យ (ទី១២ ខែឧសភា) ទីប្រឹក្សារបស់មេដឹកនាំកំពូលអ៊ីរ៉ង់ បានឲ្យដឹងថា អ៊ីរ៉ង់នឹងផ្លាស់ប្តូរគោលលទ្ធិនុយក្លេអ៊ែររបស់ខ្លួន ប្រសិនបើអ៊ីស្រាអែលគំរាមកំហែងដល់អត្ថិភាពរបស់ខ្លួន។

ទីក្រុងតេអេរ៉ង់ តែងតែនិយាយថា ខ្លួនមិនមានគម្រោងទទួលបាននូវអាវុធនុយក្លេអ៊ែរនោះទេ។ រដ្ឋាភិបាលលោកខាងលិចសង្ស័យថា ប្រទេសនេះចង់បានបច្ចេកវិទ្យានុយក្លេអ៊ែរ ដើម្បីផលិតគ្រាប់បែក ខណៈដែលកម្មវិធីនុយក្លេអ៊ែររបស់ខ្លួន គឺជាចំណុចសំខាន់ចម្បងនៃការមានជម្លោះដ៏រ៉ាំរ៉ៃ ដែលនាំទៅដល់ការដាក់ទណ្ឌកម្ម។

អំឡុងសន្និសីទសន្ទនានោះ លោក Kamal Kharrazi ទីប្រឹក្សារបស់មេដឹកនាំកំពូលលោក Ayatollah Ali Khamenei បាននិយាយថា៖ «ប្រសិនបើអ៊ីស្រាអែលហ៊ាន និងចង់ធ្វើការគំរាមកំហែងនុយក្លេអ៊ែរដល់អ៊ីរ៉ង់ យើងអាចពិចារណាឡើងវិញនូវគោលលទ្ធិនុយក្លេអ៊ែររបស់យើង»។

នេះជាលើកទី២ ហើយ ក្នុងរយៈពេលមួយសប្តាហ៍ ដែលលោក Kharrazi បាននិយាយឡើងវិញម្ដងទៀតនូវគោលនយោបាយនេះ បន្ទាប់ពីរូបលោកត្រូវបានដកស្រង់សម្តីស្រដៀងគ្នានេះ ដោយបណ្តាញព័ត៌មាននិស្សិតអ៊ីរ៉ង់ កាលពីថ្ងៃព្រហស្បតិ៍ (ទី៩ ខែឧសភា)។

នៅឆ្នាំ២២២ ទីប្រឹក្សាដដែលរូបនេះ បាននិយាយថា អ៊ីរ៉ង់មានសមត្ថភាពលើបច្ចេកទេស ក្នុងការផលិតគ្រាប់បែកនុយក្លេអ៊ែរ ប៉ុន្តែមិនទាន់សម្រេចចិត្តថា តើត្រូវផលិតគ្រាប់បែកនុយក្លេអ៊ែរ ឬយ៉ាងណា។ កិច្ចព្រមព្រៀងនុយក្លេអ៊ែរឆ្នាំ២០១៥ និងប្រទេសអ៊ីស្រាអែល ក៏ស្ថិតក្នុងចំណោមប្រធានបទនៅក្នុងសន្និសីទសន្ទនាអ៊ីរ៉ង់-អារ៉ាប់នេះផងដែរ៕