ការវិភាគមួយរបស់ក្រុមសិទ្ធិមនុស្សដែលមានមូលដ្ឋាននៅចក្រភពអង់គ្លេស បានឲ្យដឹងនៅថ្ងៃចន្ទនេះថា អគ្គិភ័យដែលត្រូវបានប្រើប្រាស់ជាអាវុធនៅក្នុងប្រទេសស៊ូដង់ បានបំផ្លាញភូមិ និងទីប្រជុំជននៅភាគខាងលិចរបស់ប្រទេសក្នុងខែមេសាច្រើនជាងខែផ្សេងទៀត ចាប់តាំងពីជម្លោះ បានចាប់ផ្តើមជាងមួយឆ្នាំមុន។ 

Sudan Witness ដែលជាគម្រោងប្រភពបើកចំហដែលគ្រប់គ្រងដោយមជ្ឈមណ្ឌលមិនរកប្រាក់ចំណេញសម្រាប់ការតស៊ូដើម្បីព័ត៌មាន បាននិយាយថា ភូមិចំនួន ៧២ និងលំនៅឋានមួយចំនួន ត្រូវបានបំផ្លាញឬខូចខាតដោយអគ្គិភ័យកាលពីខែមុន ដោយនាំឲ្យចំនួនលំនៅឋានសរុបដែលរងគ្រោះដោយភ្លើងឆេះ នៅក្នុងប្រទេសស៊ូដង់ដល់ ២០១ខ្នង ចាប់តាំងពីជម្លោះ បានចាប់ផ្តើមនៅក្នុងពាក់កណ្តាលខែមេសា ឆ្នាំមុន។

លោក Anouk Theunissen ប្រធានគម្រោង Sudan Witness បាននិយាយនៅក្នុងសេចក្តីប្រកាសព័ត៌មាន នៅថ្ងៃចន្ទនេះថា៖«យើងបានចងក្រងឯកសារអំពីគំរូនៃអគ្គិភ័យជាច្រើន និងការបំផ្លិចបំផ្លាញ បន្តដល់ការតាំងលំនៅ នៅជុំវិញប្រទេសស៊ូដង់ខាងលិច ទាំងធំទាំងតូច ចាប់តាំងពីជម្លោះ បានផ្ទុះឡើងកាលពីខែមេសាឆ្នាំមុន»។

លោក Theunissen បាននិយាយថា៖«នៅពេលដែលយើងឃើញរបាយការណ៍នៃការប្រយុទ្ធគ្នា ឬការវាយប្រហារតាមអាកាស ស្របពេលជាមួយនឹងភ្លើងចង្កោម ដែលបង្ហាញថា ភ្លើងកំពុងត្រូវបានប្រើប្រាស់ជាអាវុធនៃសង្គ្រាមតាមអំពើចិត្ត។

ចំនួនអគ្គិភ័យ បានកើនឡើងជាពិសេសនៅភាគខាងជើង និងខាងលិចនៃទីក្រុង el-Fasher ដែលជារដ្ឋធានីនៃរដ្ឋដាហ្វឺខាងជើង (North Darfur) ដែលប្រឈមមុខនឹងការគំរាមកំហែងនៃការវាយប្រហារយោធាដែលនឹងជិតឡើង។

ប្រទេសស៊ូដង់ ត្រូវបានរួបរឹតដោយអំពើហិង្សា ចាប់តាំងពីពាក់កណ្តាលខែមេសា ឆ្នាំ ២០២៣ នៅពេលដែលភាពតានតឹងរវាងយោធាស៊ូដង់ និងកងកម្លាំងយោធាប៉ារ៉ាគាំទ្ររហ័ស បានផ្ទុះឡើងដល់ការប្រយុទ្ធគ្នាដ៏ខ្លាំងក្លានៅទូទាំងប្រទេស។ ការប៉ះទង្គិចគ្នា បានរីករាលដាលយ៉ាងឆាប់រហ័សទៅកាន់ផ្នែកផ្សេងទៀតនៃប្រទទេសស៊ូដង់ រួមទាំងទីក្រុងដាហ្វឺដែលបានឃើញការវាយប្រហារយ៉ាងឃោរឃៅ។