ភាពតានតឹង បានកើនឡើងខ្ពស់នៅព្រំដែនភាគខាងជើងប្រទេសម៉ិកស៊ិកក្នុងទីក្រុង ស៊ីអូដាដ វ៉ារ៉េស(Ciudad Juarez) កាលពីថ្ងៃចន្ទ នៅពេលដែលក្រុមជនអន្តោប្រវេសន៍មួយក្រុមព្យាយាមកាត់របងបន្លាលួស ដែលបានសាងសង់ដោយឆ្មាំជាតិរដ្ឋតិចសាស់ ដើម្បីការពារពួកគេមិនឲ្យចូលទៅជិតជញ្ជាំងព្រំដែន។

ការប៉ុនប៉ងរបស់ជនអន្តោប្រវេសន៍ ត្រូវបានប្រទះឃើញដោយភ្នាក់ងារដែលបើកបររថយន្តទៅកាន់តំបន់នោះតាមរថយន្តមួយគ្រឿង ហើយចាប់ផ្តើមរារាំងពួកគេ ខណៈបានអំពាវនាវសុំជំនួយដើម្បីទប់ស្កាត់។ ប៉ុន្មាននាទីក្រោយមក ឆ្មាំរដ្ឋតិចសាស់ជាច្រើននាក់ បានមកដល់ទីតាំងកើតហេតុដោយមានកាំភ្លើងបាញ់ម្សៅម្រេច និងបានបញ្ជាឱ្យជនអន្តោប្រវេសន៍ឲ្យចាកចេញឆ្ងាយពីរបង។

ជនអន្តោប្រវេសន៍ នៅកន្លែងកើតហេតុ បានស្នើសុំឱ្យប្រធានាធិបតីសហរដ្ឋអាមេរិក លោក Joe Biden អនុញ្ញាតឱ្យពួកគេឆ្លងទៅខាងសហរដ្ឋអាមេរិក ដោយលើកហេតុផលថា ពួកគេជាក្រុមតូចមួយដែលមានមនុស្សមិនដល់១៥០ នាក់នោះទេ រួមមានទាំងកុមារ និងមនុស្សពេញវ័យ។

លោក Biden មកពីគណបក្សប្រជាធិបតេយ្យ ដែលកំពុងស្វែងរកការបោះឆ្នោតថ្មី នៅក្នុងខែវិច្ឆិកា បានចូលកាន់តំណែងក្នុងឆ្នាំ ២០២១ បានសន្យាថា នឹងមានវិធីសាស្រ្តមនុស្សធម៌ច្រើនជាងមុនចំពោះសន្តិសុខនៅព្រំដែនជាងអ្នកកាន់តំណែងមុនរបស់លោក គឺអតីតប្រធានាធិបតី លោក Donald Trump ដែលជាអ្នកប្រកាន់តឹងចំពោះបញ្ហាអន្តោប្រវេសន៍។

លោក Biden បានពង្រឹងវិធីសាស្រ្តរបស់លោកចំពោះសន្តិសុខតាមព្រំដែន ក្នុងរយៈពេលប៉ុន្មានខែថ្មីៗនេះ ខណៈជនអន្តោប្រវេសន៍បានលេចចេញជាបញ្ហាព្រួយបារម្ភខ្ពស់ក្នុងចំណោមអ្នកបោះឆ្នោត។ លោក Trump មកពីគណបក្សសាធារណរដ្ឋ កំពុងប្រជែងជាមួយ លោក Biden នៅក្នុងការបោះឆ្នោត និងបានរិះគន់រដ្ឋបាលរបស់លោក ចំពោះការកែប្រែគោលនយោបាយព្រំដែនដ៏តឹងរ៉ឹងមួយចំនួន។