ប្រជាពលរដ្ឋ និងពលករខ្មែរដែលកំពុងរស់នៅ ធ្វើការ និងសិក្សា នៅសាធារណរដ្ឋកូរ៉េ បន្ត​ចេញវីដេអូប្រកាសគាំទ្រ និងស្វាគមន៍ដំណើរទស្សនកិច្ចផ្លូវការរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលអញ្ជើញដឹកនាំគណៈប្រតិភូទៅបំពេញទស្សនកិច្ចផ្លូវការនៅសាធារណរដ្ឋកូរ៉េ ចាប់ពីថ្ងៃទី១៥ ដល់ថ្ងៃទី១៨ ខែឧសភា ឆ្នាំ ២០២៤នេះ។

ក្នុងឱកាសដំណើរទស្សនកិច្ចរបស់សម្ដេចធិបតី នាយករដ្ឋមន្រ្ដី និងលោកជំទាវបណ្ឌិត​នៅក្រៅ​ប្រទេស ប្រជាពលរដ្ឋ ពលករ និងនិស្សិតខ្មែរ ដែលកំពុងតែរស់នៅ ធ្វើការ និងសិក្សានៅក្រៅ​ប្រទេស បានបន្តចេញសារជាវីដេអូ ប្រកាសស្វាគមន៍ និងគាំទ្រចំពោះដំណើរទស្សកិច្ចរបស់​ម្ដេចធិបតី និងលោកជំទាវរួមនឹងគណៈប្រតិភូរបស់កម្ពុជា។

ប្រជាពលរដ្ឋលើកឡើងថា តាមរយៈដំណើរទស្សនកិច្ចផ្លូវការនេះ ប្រជាពលរដ្ឋខ្មែរដែលកំពុង​រស់នៅ ធ្វើការ និងបន្តការសិក្សានៅកូរ៉េ បានបង្ហាញក្ដីសប្បាយរីករាយ និងរំពឹងខ្ពស់ពីសមិទ្ធផល​នៃទំនាក់ទំនង និងកិច្ចសហប្រតិបត្តិការរវាងថ្នាក់កំពូលរបស់កម្ពុជា និងបណ្ដាថ្នាក់ដឹកនាំ​ប្រទេស​ជាមិត្ត។

សូមជម្រាបថា សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត បានអញ្ជើញបំពេញ​ទស្សនកិច្ចផ្លូវការនៅសាធារណរដ្ឋកូរ៉េ នាព្រឹកថ្ងៃទី១៥ ខែឧសភា ឆ្នាំ២០២៤ វេលាម៉ោង៧៖៤៥​នាទី។ នៅពេលទៅដល់ប្រទេសកូរ៉េ បងប្អូនសហគមន៍ខ្មែររស់នៅសាធារណរដ្ឋកូរ៉េ នឹងរងចាំ​ទទួល​​ស្វាគមន៍​សម្ដេចធិបតី និងលោកជំទាវបណ្ឌិត ចំពោះដំណើ​រអញ្ជើញ​ដល់​សណ្ឋាគារ​នៅលើ​ទឹកដីទីក្រុងសេអ៊ូល សាធារណរដ្ឋកូរ៉េ នាថ្ងៃទី១៥ ខែឧសភា ឆ្នាំ២០២៤ ចន្លោះម៉ោង ១៣៖០០-១៤៖០០រសៀល (ម៉ោងភ្នំពេញ)៕អត្ថបទ៖ វ៉ន ដារ៉ា