ក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី ១៥ ខែឧសភា ឆ្នាំ ២០២៤នេះ បាន​រៀបចំពិធីអបអរសាទរ ទិវាអន្តរជាតិស្តីពីគ្រួសារ ក្រោមប្រធានបទ «គ្រួសារ​ជាមូល​ដ្ឋាន​គ្រឹះ​ដ៏​រឹងមាំ ក្នុងការចូលរួមអភិវឌ្ឍសង្គម-សេដ្ឋកិច្ច»។

ថ្លែងក្នុងពិធីនេះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច បានលើកឡើងថា គ្រួសារ​ជា​កោសិកា​មួយ​ដ៏សំខាន់ ជាកម្លាំងចលករសម្រាប់កសាងធនធានមនុស្សឱ្យមានគុណភាពខ្ពស់ និង​សុខុមាលភាពល្អ ដែលជាទ្រព្យសកម្ម ដើម្បីបន្តរក្សាបានសុខសន្តិភាព និងបង្កើនតម្លៃ សេដ្ឋកិច្ច លើក​តម្លៃវប្បធម៌ បង្កើតគំនិតថ្មីៗ សំដៅឆ្ពោះ​ទៅ​សម្រេច​បាន​នូវ​គោលដៅ​ចីរភាព​រយៈពេល​វែង​ នៃការអភិវឌ្ឍសង្គម-សេដ្ឋកិច្ច។

ឯកឧត្តមរដ្ឋមន្ត្រីបញ្ជាក់ថា សម្រាប់កម្ពុជា រាជរដ្ឋាភិបាលបានកំណត់យកថ្ងៃទី១៥ ខែឧសភា ជា​ទិវា​អន្តរជាតិស្តីពីគ្រួសារ ដើម្បីបង្ហាញពីការយកចិត្តទុកដាក់របស់រាជរដ្ឋាភិបាលដែលជានិច្ចកាល តែង​តែ​ទទួលស្គាល់គុណតម្លៃរបស់គ្រួសារ ជាកោសិកា​សង្គម​ដ៏​មាន​សារសំខាន់​ក្នុង​ការអប់រំ​សីលធម៌​ចរិយាធម៌ ដល់សមាជិកគ្រួសារ ដើម្បីក្លាយខ្លួនទៅជាប្រជាពលរដ្ឋល្អនៅក្នុងសង្គមជាតិ។

ឯកឧត្តមលើកឡើងដែរថា ជាការគិតគូពីសំណាក់រាជរដ្ឋាភិបាល កន្លងទៅពិសេស​កំឡុង​ពេល​រាត​ត្បាត​នៃ​កូវីដ-១៩ ក៏ដូចជាបច្ចុប្បន្ន រាជរដ្ឋាភិបាល​ដាក់​ឱ្យ​អនុវត្ត​កម្ម​វិធី​ជំនួយ​សង្គម​ជា​ច្រើន​បន្ត​បន្ទាប់​។ គោលដៅសំខាន់គឺ ស្ដារជីវភាព​របស់​ប្រជាជន​ទូទៅជា​ពិសេស​ប្រជាជន​ដែល​រងគ្រោះ និង​ងាយរងគ្រោះ និងប្រជាជនក្រីក្រ។ ជាក់ស្ដែងក្នុងខែ មេសា ឆ្នាំ ២០២៤នេះ រាជរដ្ឋាភិបាល បាន​អនុវត្តកម្មវិធីជំនួយសង្គមថ្មី គឺកម្មវិធី «កញ្ចប់គ្រួសារ»។ ឯកឧត្តមបញ្ជាក់ថា កម្មវិធី​ជាតិ​ជំនួយ​សង្គម​ទាំងនេះ បានស្តែងឱ្យឃើញច្បាស់ពីការយកចិត្តទុកដាក់របស់រាជរដ្ឋាភិបាល ក្នុង​ការ​ជំរុញ​នូវគុណតម្លៃនៃការលើកកម្ពស់ឧត្តមប្រយោជន៍របស់គ្រួសារ និងការលើកស្ទួយកម្រិតជីវភាព រស់​នៅ​របស់ប្រជាជនគ្រប់រូប ដោយមិនប្រកាន់ពូជសាសន៍ ពណ៌សម្បុរ សាសនា ឋានៈតួនាទី និង​និន្នាការ នយោបាយ ដើម្បីរក្សាបាននូវតុល្យភាពសង្គម និងស្ថិរភាពជាតិ៕ អត្ថបទ៖ គឹមហុក