សាជីវកម្មនុយក្លេអ៊ែររដ្ឋ រ៉ូសាថូម (Rosatom) របស់រុស្ស៊ី បាននិយាយកាលពីថ្ងៃអង្គារ (១៤ ឧសភា) ថាការហាមឃាត់របស់សហរដ្ឋអាមេរិក លើឥន្ធនៈនុយក្លេអ៊ែររបស់រុស្ស៊ី គឺជាចលនានយោបាយរើសអើង ដែលនឹងធ្វើឱ្យខូចទីផ្សារពិភពលោកសម្រាប់ការចម្រាញ់សារធាតុអ៊ុយរ៉ានីញ៉ូម ប៉ុន្តែបាននិយាយថានឹងបន្តអភិវឌ្ឍអាជីវកម្មសកលរបស់ខ្លួន។

សេតវិមានបាននិយាយថា លោកប្រធានាធិបតី ចូ បៃដិន (Joe Biden) បានចុះហត្ថលេខាលើច្បាប់ហាមឃាត់ការចម្រាញ់សារធាតុអ៊ុយរ៉ានីញ៉ូមរបស់រុស្ស៊ី កាលពីថ្ងៃចន្ទ។ ប្រហែល ២៤ ភាគរយនៃសារធាតុអ៊ុយរ៉ានីញ៉ូមចម្រាញ់ ដែលប្រើប្រាស់ដោយរោងចក្រថាមពលនុយក្លេអ៊ែររបស់សហរដ្ឋអាមេរិក បានមកពីប្រទេសរុស្ស៊ី។

សាជីវកម្មនុយក្លេអ៊ែររុស្ស៊ី រ៉ូសាថូម បាននិយាយកាលពីឆ្នាំ២០២២ ថា ខ្លួនគឺជាតួអង្គដ៏ធំបំផុតរបស់ពិភពលោកក្នុងការចម្រាញ់សារធាតុអ៊ុយរ៉ានីញ៉ូម ដែលមាន ៣៥ ភាគរយនៃទីផ្សារពិភពលោក ព្រមទាំងកាន់កាប់ទុនបម្រុងអ៊ុយរ៉ានីញ៉ូមធំជាងគេទីពីរ ហើយក៏ជាអ្នកផលិតអ៊ុយរ៉ានីញ៉ូមធំជាងគេទីពីររបស់ពិភពលោកផងដែរ។

វិមានក្រឹមឡាំងបាននិយាយថា ការសម្រេចចិត្តរបស់សហរដ្ឋអាមេរិក ក្នុងការហាមឃាត់ឥន្ធនៈរុស្ស៊ី មិនសំខាន់សម្រាប់រុស្ស៊ីទេ ប៉ុន្តែនឹងប៉ះពាល់ខ្លាំងដល់អាមេរិកខ្លួនឯង នៅពេលដែលពួកគេដឹងថាខ្លួនពិបាកក្នុងការប្រកួតប្រជែងជាមួយរុស្ស៊ី ហើយបានប្រើវិធានការបង្កាច់បង្ខូច និងធ្វើឱ្យប៉ះពាល់ដល់បទដ្ឋាននៃទីផ្សារពិភពលោក៕