បន្ទាយមានជ័យ៖ នៅថ្ងៃព្រឹកទី១៦ ខែឧសភា ឆ្នាំ២០២៤ ឯកឧត្ដមឧត្ដមសេនីយ៍ឯក ជុំ ផល្លា អគ្គនាយករងអន្តោប្រវេសន៍ និងលោកឧត្ដមសេនីយ៍ទោ វឌ្ឍនៈ មង្គល ប្រធាននាយកដ្ឋានច្រកទ្វារទី១ អមដំណើរដោយលោកឧត្ដមសេនីយ៍ វរសេនីយ៍ អនុប្រធាននាយកដ្ឋាន និងសហការី បានចុះបំពេញបេសកកម្មនៅ ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ ។

ការចុះបំពេញបេសកកម្មនេះឯកឧត្ដម ឧត្ដមសេនីយ៍ឯក និងលោកឧត្ដមសេនីយ៍ទោ រួមទាំងសហការី បានអញ្ជើញទៅត្រួតពិនិត្យភូមិសាស្ត្រ ស្លាបឆ្វេង ស្លាបស្ដាំ និងគោលដៅប្រតិបត្តិការរបស់ប៉ុស្តិ៍ បន្ទាប់មកជួបប្រជុំសំណេះសំណាលជាមួយមន្ត្រី នៅសាលប្រជុំស្ថានីយរថភ្លើងប៉ោយប៉ែត ។

ក្នុងកិច្ចសំណេះសំណាលឯកឧត្ដម ឧត្ដមសេនីយ៍ឯក និងលោកឧត្ដមសេនីយ៍ទោ បានពាំនាំ​នូវការផ្ដាំផ្ញើការសួរសុខទុក្ខពីសំណាក់ឯកឧត្ដម ឧត្ដមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ និងបានមានមតិក្រើនរំលឹក​ដល់​មន្ត្រីប៉ុស្តិ៍ទាំងអស់​ត្រូវខិតខំ​បំពេញតួនាទីភារៈកិច្ចបម្រើសេវាជូនអ្នកដំណើរជាតិ-អន្តរជាតិ ​ឱ្យបានល្អប្រសើរ ប្រកប​ដោយ​ស្នាមញញឹម សុជីវធម៌ ភាព​ទន់ ភ្លន តែត្រូវហ្មត់ចត់ក្នុងការងារ ជាពិសេសត្រូវយក​ចិត្តទុកដាក់ខ្ពស់​ចំពោះមុខសញ្ញាបញ្ជីខ្មៅដែលថ្នាក់លើប្រគល់ជូន និងត្រូវប្រកាន់ភ្ជាប់នូវវិន័យ​កងកម្លាំន​គរបាលជាតិ​លេខ ៨៣៧ប្រក ចុះថ្ងៃទី៥ ខែមីនា ឆ្នាំ២០២៤ របស់ក្រសួងមហាផ្ទៃ ឱ្យបានខ្ជាប់ខ្ជួន និហត្រូវបង្កើនស្មារតីទទួលខុសត្រូវបន្ថែមទៀតក្នុងការសម្របសម្រួលដំណើរចូល-ចេញជូន​ពលករខ្មែរដែលទៅធ្វើការងារនៅក្រៅប្រទេស បើទោះបីជាកន្លងមកប៉ុស្តិ៍នគរបាល​ច្រកទ្វារព្រំដែនអន្តរជាតិប៉ោយប៉ែត អនុវត្តបានល្អប្រសើរយ៉ាងណាក៏ដោយ ។

ឆ្លៀតក្នុងឱកាសនេះផងដែរឯកឧត្ដម ឧត្ដមសេនីយ៍ឯក ​បានសម្ដែងនូវការកោតសរសើរ និងវាយ​តម្លៃខ្ពស់​ដល់​លោកឧត្ដមសេនីយ៍ត្រី នាយប៉ុស្តិ៍ និងមន្រ្តីក្រោមឱវាទ​ទាំងអស់ដែលបាន​ខិតខំ​ប្រឹងប្រែងយកអស់ពីកម្លាំងកាយចិត្ត​ ទាំងការសហការជាមួយស្ថាប័នពាក់ព័ន្ធ អាជ្ញាធរដែនដី ជា​ពិសេសជាមួយភាគីថៃ ក្នុងការអនុវត្តការងារជំនាញតាមតួនាទីភារកិច្ចបានយ៉ាងល្អ ឯកឧត្តម ក៏បានផ្តល់នូវអនុសាសន៍បន្ថែមមួយចំនួន ដើម្បី​ឆ្លុះបញ្ចាំង​ពីគន្លឹៈក្នុងការបញ្ជា​ដឹកនាំមន្រ្តី​ក្រោម​ឱវាទប្រកបដោយស្ថេរភាព ​និងប្រសិទ្ធិភាពខ្ពស់ ៕