បន្ទាយមានជ័យ ៖ អាជ្ញាធរខេត្តបន្ទាយមានជ័យ បានដាក់បទបញ្ជាយ៉ាងម៉ឺងម៉ាត់ទៅដល់គ្រប់បណ្ដាកងកម្លាំងឈរជើងនៅតាមបន្ទាត់ព្រំដែន អាជ្ញាធរក្រុង-ស្រុកជាប់ព្រំដែនកម្ពុជា-ថៃ ត្រូវបន្តសហការគ្នាក្នុងការរឹតបន្តឹងទប់ស្កាត់ការនាំចូលទំនិញគេចពន្ធផ្សេងៗ ជាពិសេសសាច់បង្កក់ ដែលកំពុងតែមានការលួចនាំចូលនៅតាមបន្ទាត់ព្រំដែន។
ការដាក់ចេញនូវបទបញ្ជាក់នេះធ្វើឡើងនៅក្នុងកិច្ចប្រជុំ ស្តីពីការទប់ស្កាត់ បង្ក្រាបការរត់គេចពន្ធសាច់បង្កក និងទំនិញខូចគុណភាពតាមបន្ទាត់ព្រំដែនកម្ពុជា-ថៃ ក្នុងភូមិសាស្ត្រខេត្តបន្ទាយមានជ័យ ដែលដឹកនាំលោក ឃ្លោក នួយ អភិបាលរងខេត្ត តំណាងឯកឧត្តម អ៊ុំ រាត្រី អភិបាលខេត្តធ្វើឡើងនីសាលាខេត្តបន្ទាយមានជ័យ នៅរសៀលថ្ងៃទី១៥ ខែឧសភា ឆ្នាំ២០២៤។
លោក ឃ្លោក នួយ ក៏បានបញ្ជាក់ទៀតថា ដើម្បីទប់ស្កាត់ បង្ក្រាបការរត់គេចពន្ធសាច់បង្កក និងទំនិញខូចគុណភាពតាមបន្ទាត់ព្រំដែន កម្ពុជា-ថៃ ក្នុងនាមអាជ្ញាធរមានសមត្ថកិច្ចត្រូវតែមានវិធានការបន្ទាន់ទប់ស្កាត់កុំឱ្យមានការលួចនាំចូលនូវទំនិញគេចពន្ធផ្សេងៗ ជាពិសេសសាច់បង្កក់ មិនត្រូវឱ្យមានការហូរចូលតាមច្រកព្រំដែនឡើយ។
សូមបញ្ជាក់ផងដែរថា កាលពីដើមឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានណែនាំដល់ក្រសួង និងស្ថាប័នពាក់ព័ន្ធទាំងអស់ ត្រូវតែរួមគ្នាដើម្បីទប់ស្កាត់ការនាំចូលសាច់បង្កក ដើម្បីលើកកម្ពស់ការចិញ្ចឹមជ្រូកក្នុងស្រុក ហើយសម្តេចធិបតី ចង់ឃើញការពង្រឹងការវិនិយោគក្នុងស្រុកលើវិស័យកសិកម្ម ដើម្បីធ្វើការនាំចេញទៅក្រៅប្រទេស ៕ អត្ថបទ រឿង ចន្ទ្រា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
