ការប៉ះទង្គិចគ្នារវាងអ៊ីស្រាអែល និងអង្គការសហប្រជាជាតិ កាន់តែអាក្រក់ទៅៗ នៅពេលដែលកងទ័ពអ៊ីស្រាអែល ទាមទារការពន្យល់លើវីដេអូមួយ ដែលបង្ហាញពីបុរសប្រដាប់អាវុធស្ថិតនៅក្បែររថយន្តរបស់ទីភ្នាក់ងារផ្តល់ជំនួយសង្គ្រោះប៉ាឡេស្ទីនរបស់អង្គការសហប្រជាជាតិ ខណៈការប្រយុទ្ធនៅតែខ្លាំងក្លាទូទាំងតំបន់ហ្កាហ្សា។

អ៊ីស្រាអែលបាននិយាយថា កងទ័ពរបស់ខ្លួនបានកំណត់អត្តសញ្ញាណអ្នកប្រយុទ្ធនៅក្នុងបរិវេណភស្តុភារកណ្តាលនៃទីភ្នាក់ងារសង្គ្រោះប៉ាឡេស្ទីន UNRWA ភាគខាងកើតនៃទីក្រុងរ៉ាហ្វា (Rafah) ហើយចង់ឱ្យមានការពន្យល់ពីមូលហេតុសមស្រប។ មន្ត្រីជាន់ខ្ពស់ក្រុមហាម៉ាស បានប្រាប់សារព័ត៌មានរ៉យទ័រ ថាខ្មាន់កាំភ្លើងនៅទីនោះដើម្បីការពារការចែកចាយជំនួយប៉ុណ្ណោះ។

អ្នកនាំពាក្យទីភ្នាក់ងារជំនួយ UNRWA បាននិយាយថា ទីភ្នាក់ងារមិនអាចផ្ទៀងផ្ទាត់ភាពត្រឹមត្រូវ ឬខ្លឹមសារនៃវីដេអូ ពេលវេលា ឬទីតាំងពិតប្រាកដនោះទេ ប៉ុន្តែទំនងជាវីដេអូបង្ហាញឃ្លាំងនៅក្រុងរ៉ាហ្វា ដែលបុគ្គលិកខ្លួនបានចាកចេញនៅថ្ងៃទី៦ ខែឧសភា។

កងទ័ពអ៊ីស្រាអែល បានប្រយុទ្ធជាមួយពួកសកម្មប្រយុទ្ធនៅទូទាំងតំបន់ហ្កាហ្សា កាលពីថ្ងៃពុធ រួមទាំងនៅក្រុងរ៉ាហ្វា ភាគខាងត្បូងដែលជាជម្រកសម្រាប់ជនស៊ីវិល នៅក្នុងការកើនឡើងនៃសង្គ្រាមរយៈពេលជាងប្រាំពីរខែ ដែលបានសម្លាប់ប្រជាជនប៉ាឡេស្ទីនរាប់ម៉ឺននាក់៕