ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃសុក្រ (១៧ ឧសភា) នេះថា លោកស្រី គីម យ៉ូជុង (Kim Yo Jong) ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានបដិសេធជាថ្មីម្តងទៀតនូវការដោះដូរសព្វាវុធជាមួយរុស្ស៊ី ដោយនិយាយថា ប្រព័ន្ធអាវុធដែលទើបនឹងបង្កើត និងធ្វើបច្ចុប្បន្នភាពរបស់ប្រទេសលោកស្រី មិនមែនសម្រាប់លក់ទៅឱ្យប្រទេសណាផ្សេងនោះទេ។

សហរដ្ឋអាមេរិក និងកូរ៉េខាងត្បូង បានចោទប្រកាន់កូរ៉េខាងជើង ថាបានផ្ទេរសព្វាវុធទៅឱ្យរុស្ស៊ី សម្រាប់ប្រើប្រាស់ប្រឆាំងនឹងអ៊ុយក្រែន ដែលខ្លួនបានឈ្លានពានកាលពីខែកុម្ភៈ ឆ្នាំ២០២២។ ទាំងក្រុងមូស្គូ និងក្រុងព្យុងយ៉ាង បានបដិសេធការចោទប្រកាន់នេះ ប៉ុន្តែបានប្តេជ្ញាកាលពីឆ្នាំមុនថានឹងធ្វើឱ្យទំនាក់ទំនងយោធាកាន់តែស៊ីជម្រៅ។

ទំនាក់ទំនងរវាងប្រទេសទាំងពីរបានពង្រឹងយ៉ាងខ្លាំងបន្ទាប់ពីដំណើរទស្សនកិច្ចរបស់មេដឹកនាំកូរ៉េខាងជើងលោក គីម ជុងអ៊ុន ទៅកាន់ភាគខាងកើតប្រទេសរុស្ស៊ី កាលពីខែកញ្ញា និងជំនួបកំពូលជាមួយលោកប្រធានាធិបតី វ៉្លាឌីមៀ ពូទីន (Vladimir Putin)។

ប៉ុន្តែយោងតាមសារព័ត៌មាន KCNA ដកស្រង់សេចក្តីថ្លែងការណ៍បានឱ្យដឹងថា លោកស្រី គីម យ៉ូជុង បាននិយាយថា «ទ្រឹស្តី» កិច្ចព្រមព្រៀងសព្វាវុធកូរ៉េខាងជើង និងរុស្ស៊ី បង្កើតឡើងដោយការរើសអើង និងការប្រឌិត គឺជា «ទ្រឹស្តីមិនសមហេតុផលបំផុត» ដែលមិនសមនឹងទទួលបានការវាយតម្លៃ ឬការបកស្រាយពីនរណាម្នាក់ឡើយ ដោយហៅវាថាជាពាក្យចចាមអារ៉ាមមិនពិត ដែលត្រូវបានធ្វើឱ្យរីករាលដាលដោយកម្លាំងអរិភាព៕