រដ្ឋមន្ត្រីក្រសួងមហាផ្ទៃលោក ម៉ាតាស់ ស៊ូតាច អេស្តូក (Matuss Sutaj Estok) បាននិយាយថា បុរសដែលធ្វើឲ្យលោកនាយករដ្ឋមន្ត្រីស្លូវ៉ាគីរ៉ូប៊ើត ហ្វីកូ (Robert Fico) រងរបួសធ្ងន់ កាលពីថ្ងៃពុធទី១៥ ខែឧសភា សប្ដាហ៍នេះ គឺជាអ្នករិះគន់យ៉ាងខ្លាំងក្លា ចំពោះការសម្រេចចិត្តចុងក្រោយ ក្នុងការបញ្ឈប់ការដឹកជញ្ជូនអាវុធទៅកាន់ប្រទេសអ៊ុយក្រែន។

លោក Fico ត្រូវបានគេបាញ់ចំសន្លាក់ឆ្អឹងជាច្រើនគ្រាប់កាលពីថ្ងៃពុធ ខណៈលោកបានស្វាគមន៍ក្រុមអ្នកគាំទ្រនៃព្រឹត្តិការណ៍នយោបាយមួយក្នុងទីប្រជុំជន ហ៊ែនឡូវ៉ា (Handlova)។ ជនដៃដល់ត្រូវបានចាប់ខ្លួនភ្លាមៗ ហើយលោកនាយករដ្ឋមន្ត្រីត្រូវបានបញ្ជូនទៅមន្ទីរពេទ្យក្នុងស្ថានភាពធ្ងន់ធ្ងរ។ អាជ្ញាធរមូលដ្ឋានបាននិយាយថ្មីៗនេះថាពិតជាមានហេតុផលខាងនយោបាយច្បាស់លាស់ណាស់ នៅពីក្រោយការវាយប្រហារនេះ ។ ក្រោយមកមានសេចក្ដីរាយការណ៍ថា លោកនាយករដ្ឋមន្ត្រី ស្ថិតក្នុងស្ថានភាពនឹង-ន លែងមានការគំរាមកំហែងដល់អាយុជីវិតហើយ ។

របាយការណ៍ប្រព័ន្ធផ្សព្វផ្សាយនានា បានកំណត់អត្តសញ្ញាណជនវាយប្រហារមានឈ្មោះថា ជូរាច ស៊ីនទូ ឡា (Juraj Cintula)វ័យ៧១ ឆ្នាំ មានការងារជាស្ថាបនិកនៃសមាគមអ្នកនិពន្ធស្លូវ៉ាគី និងជាអ្នកគាំទ្រគណបក្សប្រឆាំង ស្លូវ៉ាគីជឿនលឿន (Progressive Slovakia )។

កាលពីថ្ងៃព្រហស្បតិ៍សប្ដាហ៍នេះដែរ លោក ស៊ូតាច អេស្តូក (Sutaj Estok) បានបញ្ជាក់របាយការណ៍ប្រព័ន្ធផ្សព្វផ្សាយថ្មីៗនេះថា ជនល្មើសត្រូវបានចោទប្រកាន់ពីបទឧក្រិដ្ឋកម្មគិតទុកជាមុននៃការប៉ុនប៉ងមនុស្សឃាត ហើយបានសង្កត់ធ្ងន់ថា នេះគឺជាសកម្មភាពដែលមានហេតុផលនយោបាយ៕