ក្រុមមន្ត្រីហ្វីលីពីន បាននិយាយកាលពីថ្ងៃព្រហស្បតិ៍ ១៦ ឧសភាសប្ដាហ៍នេះ ថាក្រុមហ្វីលីពីនដែលដឹកនាំបេសកកម្មផ្គត់ផ្គង់ជនស៊ីវិលនៅសមុទ្រចិនខាងត្បូង បានបញ្ជូនស្បៀងអាហារ និងឥន្ធនៈទៅឱ្យក្រុមអ្នកនេសាទហ្វីលីពីន ទោះបីត្រូវបានដេញតាមដោយនាវាចិនក៏ដោយ ដោយហៅសកម្មភាពនេះថាជា ជ័យជម្នះដ៏ធំ។

ក្រុមដែលមានសមាជិក ១០នាក់ ត្រូវបានបញ្ជូនដោយក្រុម មានឈ្មោះថា អាទីនអ៊ីតូ (Atin Ito)មានន័យថា នេះគឺជារបស់យើង (This is Ours) ទៅកាន់តំបន់ដែនទឹកមានជម្លោះ ស្កាបូរូស៊ូល (Scarborough Shoal ) មួយថ្ងៃមុនក្រុមនាវាពាណិជ្ជកម្ម៥ គ្រឿង និងទូកនេសាទតូចៗចំនួន ១០០គ្រឿង ដែលបានចេញដំណើរកាលពីថ្ងៃពុធសប្ដាហ៍នេះ។ទីបំផុត នាវាដែលនៅសល់បានវិលត្រឡប់ទៅវិញ ដោយពុំបានទៅដល់ដែនទឹកនោះទេ។

លោក អ៊ីមែន ហ៊ីហ្សុន (Emman Hizon)អ្នកនាំពាក្យក្រុម អាទីន អ៊ីតូ បាននិយាយថា បេសកកម្មនេះ សម្រេចបានជ័យជម្នះដ៏សំខាន់មួយ នៅពេលក្រុមនេះរុលទៅមុខចូលដល់ជិតតំបន់ ប៉ាណាតាកស៊ូល (Panatag Shoal) កាលពីថ្ងៃទី ១៥ ខែឧសភា ហើយអាចផ្គត់ផ្គង់ដល់ក្រុមអ្នកនេសាទនៅក្នុងតំបន់នោះ ដោយប្រើឈ្មោះក្នុងស្រុកស្កាបូរូស៊ូល (Scarborough)។

ដោយស្ថិតនៅខាងក្នុងតំបន់សេដ្ឋកិច្ចផ្តាច់មុខមានទំហំ ៣៧០ គីឡូម៉ែត្រ របស់ទីក្រុងម៉ានីល ដែនទឹក Scarborough Shoal នេះ ត្រូវបានដណ្ដើមគ្នាដោយសារវាជាអាងស្តុកត្រីដ៏សម្បូរបែប និង សមុទ្រខៀវស្រងាត់ ដែលផ្តល់ជាជម្រកសុវត្ថិភាព សម្រាប់នាវាក្នុងអំឡុងពេលមានព្យុះ៕