សម្ព័ន្ធអារ៉ាប់កាលពីថ្ងៃព្រហស្បតិ៍ បានអំពាវនាវឲ្យដាក់ពង្រាយបេសកកម្មរក្សាសន្តិភាពរបស់អង្គការសហប្រជាជាតិ នៅតំបន់ហ្កាហ្សាស្ទ្រីប និងតំបន់វេសបែង។

នៅក្នុងកិច្ចប្រជុំកំពូលនៃអង្គការដែលមានសមាជិក ២២ប្រទេស ក្រុមនេះ ក៏បានអំពាវនាវឲ្យមានបទឈប់បាញ់ភ្លាមៗ នៅក្នុងតំបន់ហ្កាហ្សា និងបានថ្កោលទោសយ៉ាងខ្លាំងចំពោះការរុលទៅមុខនៃកងទ័ពអ៊ីស្រា   អែលចូលទៅក្នុងទីក្រុងរ៉ាហ្វាភាគខាងត្បូងនៃតំបន់ឆ្នេរដែលពោរពេញទៅដោយជនភៀសខ្លួន។

ក្រុមនេះ បាននិយាយនៅក្នុងសេចក្តីថ្លែងការណ៍ចុងក្រោយរបស់កិច្ចប្រជុំកំពូលថា ជំហានដែលមិនអាចផ្លាស់ប្តូរបានឆ្ពោះទៅរកដំណោះស្រាយរដ្ឋពីរ នៅអ៊ីស្រាអែល និងទឹកដីប៉ាឡេស្ទីន ត្រូវតែធ្វើឡើង។ កិច្ចប្រជុំប្រចាំឆ្នាំនេះ បានធ្វើឡើងជាលើកដំបូងក្នុងឆ្នាំនេះ នៅក្នុងទីក្រុងម៉ាណាម៉ា( Manama) រដ្ឋធានីរបស់ប្រទេសបារ៉ែន។

ព្រះអង្គម្ចាស់អារ៉ាប៊ីសាអ៊ូឌីត និងជាអ្នកគ្រប់គ្រងជាក់ស្តែងនៃព្រះរាជាណាចក្រនេះ Mohammed bin Salman បានសង្កត់ធ្ងន់ថា «ការឈ្លានពានដ៏ខ្លាំងក្លា» ប្រឆាំងនឹងបងប្អូនប៉ាឡេស្ទីន ត្រូវតែបញ្ឈប់។     ព្រះអង្គ បានមានព្រះបន្ទូលទៀតថា វាជាការចាំបាច់សម្រាប់សហគមន៍អន្តរជាតិ ក្នុងការបំពេញការទទួលខុសត្រូវនេះ។

នៅក្នុងសុន្ទរកថារបស់ព្រះអង្គ ព្រះមហាក្សត្រនៃប្រទេសបារ៉ែន Hamad bin Isa al-Khalifa បានអំពាវនាវឲ្យមានសន្និសីទសន្តិភាពអន្តរជាតិសម្រាប់មជ្ឈិមបូព៌ា។

លោក Ahmed Abul Gheit អគ្គលេខាធិការនៃសម្ព័ន្ធអារ៉ាប់ និងជាអ្នកការទូតអេហ្ស៊ីបម្នាក់ បាននិយាយថា កិច្ចប្រជុំកំពូលនេះ បានធ្វើឡើងនៅក្រោមកាលៈទេសៈដ៏សំខាន់បំផុត។

លោក Ahmed បានបញ្ជាក់យ៉ាងច្បាស់ថា ការឈ្លានពានរបស់អ៊ីស្រាអែលប្រឆាំងនឹងប្រជាជន នៅតំបន់ហ្កាហ្សា គឺជាពេលដែលមានការផ្លាស់ប្តូរជាប្រវត្តិសាស្ត្រមួយ ដោយបានបន្ថែមថា ប្រជាជនអារ៉ាប់ នឹងមិនបំភ្លេចអំពើហិង្សាដ៏ងងឹតងងល់នៃការកាន់កាប់របស់អ៊ីស្រាអែលឡើយ។