មនុស្សជាង ២០នាក់ដែលត្រូវបានគេជឿថា ជាសមាជិកនៃក្រុមភេរវករ Jemaah Islamiyah (JI) ត្រូវបាននគរបាលម៉ាឡេស៊ីចាប់ខ្លួន បន្ទាប់ពីមានការវាយប្រហារលើប៉ុស្តិ៍នគរបាលមួយកន្លែង នៅជាយក្រុង Johor Bahru នាព្រឹកព្រលឹមថ្ងៃសុក្រ (ទី១៧ ខែឧសភា) នេះ។

ការវាយប្រហារ នៅឯប៉ុស្តិ៍នគរបាល Ulu Tiram វេលាម៉ោងប្រហែល ២ និង ៣០នាទីព្រឹក បានសម្លាប់មន្ត្រីនគរបាល ២នាក់ និងបានធ្វើឲ្យមនុស្សម្នាក់រងរបួស។ ក្នុងសន្និសីទសារព័ត៌មាននៅខាងក្រៅប៉ុស្តិ៍នគរបាលនោះ អគ្គស្នងការនគរបាលម៉ាឡេស៊ី លោក Razarudin Husain បាននិយាយថា ជនសង្ស័យភេទប្រុសវ័យ ២១ឆ្នាំ បានចូលប៉ុស្តិ៍នគរបាល ប្រដាប់ដោយប្រដាប់អាវុធ ហើយរូបគេបានវាយប្រហារនគរបាលម្នាក់នៅជិតច្រកចូលប៉ុស្តិ៍ ដោយបានយកកាំភ្លើងខ្លីរបស់នគរបាលរូបនោះ។

លោក Razarudin បានបន្ថែមថា បន្ទាប់មកការបាញ់ប្រហារគ្នា ក៏បានកើតឡើងនៅកន្លែងចតរថយន្តរបស់ប៉ុស្តិ៍ រវាងជនសង្ស័យ និងមន្រ្តីនគរបាល ដែលបណ្តាលឲ្យមន្រ្តីម្នាក់ទៀតស្លាប់។ ជនសង្ស័យក៏ត្រូវបានបាញ់សម្លាប់ដែរក្នុងការហេតុការណ៍បាញ់តគ្នានេះ។ លោកបានបន្តថា បន្ទាប់មកមន្ត្រីនគរបាលបានចាប់ផ្ដើមឆែកឆេរផ្ទះជនសង្ស័យ ហើយបានរកឃើញភស្តុតាងថា ជននោះជាសមាជិករបស់ក្រុម JI។ នៅពេលអ្នកសារព័ត៌មានសួរអំពីអ្វីដែលជាហេតុផលនៃការវាយប្រហារនោះ លោក Razarudin បានឆ្លើយថា៖ «ពួកគេជាសមាជិករបស់ក្រុម JI។ យើងសង្ស័យថា (វា គឺដើម្បីទទួលបានអាវុធ) ប៉ុន្តែយើងត្រូវតែស៊ើបអង្កេតបន្ថែមទៀត»។

ជាមួយគ្នានេះ លោក Razarudin បានគូសបញ្ជាក់បន្ថែមថា មនុស្សជាង ២០នាក់ដែលត្រូវបានជឿថា មានទំនាក់ទំនងជាមួយក្រុម JI ត្រូវបានចាប់ខ្លួន ដើម្បីសាកសួរ ក្នុងនោះរួមទាំងសមាជិក ៥នាក់នៃគ្រួសារជនសង្ស័យដែលមានអាយុចន្លោះពី ១៩ឆ្នាំ ទៅ ៦២ឆ្នាំផងដែរ។ សូមបញ្ជាក់ថា ក្រុម Jemaah Islamiyah (JI) មានទំនាក់ទំនងជាមួយអាល់កៃដា ជាក្រុមភេរវករដែលបានធ្វើការវាយប្រហារ កាលពីថ្ងៃ ១១ កញ្ញា នៅសហរដ្ឋអាមេរិក ក្នុងឆ្នាំ ២០០១។ ក្រុម JI ទទួលខុសត្រូវចំពោះការវាយប្រហារភេរវកម្មដ៏សាហាវបំផុតមួយចំនួនរបស់ប្រទេសឥណ្ឌូនេស៊ី ក្នុងនោះរួមទាំងការបំផ្ទុះគ្រាប់បែកនៅកោះបាលី ឆ្នាំ២០០២ ដែលបានសម្លាប់មនុស្សជាង ២០០នាក់ផងដែរ៕