និយតករសហភាពអឺរ៉ុប (EU) បានបើកការស៊ើបអង្កេតជាផ្លូវការលើក្រុមហ៊ុន Meta ពាក់ព័ន្ធនឹងការអាចបំពានលើច្បាប់មាតិកាអនឡាញ ទាក់ទងនឹងសុវត្ថិភាពកុមារ នៅក្នុងវេទិការបស់បណ្ដាញសង្គម Facebook និង Instagram របស់ក្រុមហ៊ុននេះ។

កាលពីថ្ងៃព្រហស្បតិ៍ (ទី១៦ ខែឧសភា) គណៈកម្មការអឺរ៉ុបបាននិយាយថា ខ្លួនព្រួយបារម្ភថា ប្រព័ន្ធដំណើរការនីតិវិធីស្វ័យប្រវត្តិដែលប្រើដោយវេទិកាបណ្ដាញសង្គមដ៏ពេញនិយម ដើម្បីណែនាំវីដេអូ និងការបង្ហោះនោះ អាច «ទាញយកចំណេញលើកម្សោយ និងការគ្មានបទពិសោធន៍» របស់កុមារ និងជំរុញឲ្យមាន «ទង្វើញៀន»។

អ្នកស៊ើបអង្កេតរបស់ EU ក៏នឹងពិនិត្យមើលថា តើប្រព័ន្ធទាំងនេះ កំពុងពង្រឹងអ្វីដែលគេហៅថា «រន្ធទន្សាយ» (ភាពច្របូលច្របល់) ដែលនាំអ្នកប្រើប្រាស់ចុចទៅរកមាតិកាដែលរំខានកាន់តែខ្លាំងឡើង។ ជាមួយគ្នានេះ នាយកប្រតិបត្តិរបស់ប្លុកនេះបាននិយាយនៅក្នុងសេចក្តីថ្លែងការណ៍មួយថា៖ «លើសពីនេះ គណៈកម្មការក៏មានការព្រួយបារម្ភអំពីការធានាអាយុ និងវិធីសាស្រ្តផ្ទៀងផ្ទាត់ដែលដាក់ដោយក្រុមហ៊ុន Meta ផងដែរ»។

គួរបញ្ជាក់ថា ការស៊ើបអង្កេតនេះកំពុងត្រូវបានធ្វើឡើងក្រោមច្បាប់សេវាកម្មឌីជីថល (DSA) ជាច្បាប់ដែលតម្រូវឲ្យក្រុមហ៊ុនបច្ចេកវិទ្យាធំបំផុតរបស់ពិភពលោកបង្កើនកិច្ចខិតខំប្រឹងប្រែងរបស់ពួកគេ ក្នុងការការពារអ្នកប្រើប្រាស់អឺរ៉ុបតាមប្រព័ន្ធអ៊ីនធឺណិត។ DSA មានច្បាប់យ៉ាងតឹងរ៉ឹង ដើម្បីការពារកុមារ និងធានាភាពឯកជន និងសុវត្ថិភាពរបស់ពួកគេ តាមប្រព័ន្ធអ៊ីនធឺណិត៕