ទីភ្នាក់ងារសារព័ត៌មាន TASS បានរាយការណ៍នៅថ្ងៃសុក្រនេះថា ទំនាក់ទំនងការទូតរបស់រុស្ស៊ីជាមួយលោកខាងលិច គឺស្ថិតក្នុងរបៀបគ្រប់គ្រងវិបត្តិ ហើយផ្តោតលើការព្យាយាមធានាថា ភាពតានតឹង មិនហៀរចូលទៅក្នុងជម្លោះទ្រង់ទ្រាយធំនោះទេ។

សារព័ត៌មាន TASS បានដកស្រង់សម្តីអនុរដ្ឋមន្ត្រីការបរទេសលោក Sergei Ryabkov ដែលបានប្រាប់ខ្លួននៅក្នុងបទសម្ភាសន៍មួយថា ការធានាសន្តិសុខដែលរុស្ស៊ីបានស្វែងរក និងពិភាក្សាជាមួយលោកខាងលិច ក្នុងឆ្នាំ ២០២១ លែងពាក់ព័ន្ធទៀតហើយ ហើយថា ក្រុងមូស្គូលែងទុកចិត្តលើសម្ព័ន្ធមិត្តយោធា            ណាតូ        តទៅទៀតហើយ។

លោក Ryabkov បានប្រាប់សារព័ត៌មាន TASS ថា៖«ទំហំអាទិភាពរបស់យើង រួមទាំងនៅក្នុងផ្នែកនៃការធានាសុវត្ថិភាពផ្ទាល់ខ្លួនរបស់យើង និងបង្កើតក្របខ័ណ្ឌស្ថិរភាពបន្ថែមទៀតសម្រាប់កិច្ចខិតខំប្រឹងប្រែងទាំងនេះ បានផ្លាស់ប្តូរទាំងស្រុង (ចាប់តាំងពីឆ្នាំ ២០២១មក)។

លោក Ryabkov បានបញ្ជាក់ថា អ្វីដែលកំពុងកើតឡើងនៅលើទិសដៅលោកខាងលិចឥឡូវនេះ គឺភារកិច្ចរបស់យោធា»។ ខ្ញុំចង់និយាយថា «ការទូតក្នុងទិសដៅនេះ កំពុងដំណើរការ នៅក្នុងរបៀបគ្រប់គ្រងវិបត្តិ និងក្នុងការទប់ស្កាត់មិនឲ្យធ្លាក់ក្នុងជម្លោះទ្រង់ទ្រាយធំពិតប្រាកដ»។