តម្លៃលំនៅឋានថ្មីរបស់ប្រទេសចិន បានធ្លាក់ចុះក្នុងអត្រាប្រចាំខែយ៉ាងលឿនបំផុត ក្នុងរយៈពេលជាង ៩ឆ្នាំ នៅខែមេសា ដោយនេះបានបន្តបន្ថែមសម្ពាធលើអាជ្ញាធរ ខណៈកិច្ចខិតខំប្រឹងប្រែងកាន់តែខ្លាំងឡើង ដើម្បីលើកកម្ពស់វិស័យអចលនទ្រព្យដែលកំពុងរងគ្រោះ បង្ហាញសញ្ញាតិចតួចណាស់ពីការទទួលបានផល។

តម្លៃបានធ្លាក់ចុះ ០,៦ភាគរយ ក្នុងខែមេសា ធៀបនឹងខែមុន ដែលអាក្រក់ជាងអត្រា ០,៣ភាគរយ នៅក្នុងខែមីនា ពោលគឺជាល្បឿនដ៏លឿនបំផុត គិតចាប់តាំងពីខែវិច្ឆិកា ឆ្នាំ២០១៤។ នេះបើយោងតាមការគណនារបស់សារព័ត៌មាន Reuters ដោយផ្អែកលើទិន្នន័យរបស់ការិយាល័យស្ថិតិជាតិ (NBS) ដែលបានចេញផ្សាយ នៅថ្ងៃសុក្រ (ទី១៧ ខែឧសភា) នេះ។ ទិន្នន័យបានបង្ហាញថា តម្លៃបានធ្លាក់ចុះក្នុងរយៈពេលដប់ខែជាប់ៗគ្នា។

នៅក្នុងលក្ខខណ្ឌប្រចាំឆ្នាំ តម្លៃផ្ទះថ្មីបានធ្លាក់ចុះក្នុងអាត្រាលឿនហួសហេតុ ចាប់តាំងពីខែកក្កដា ឆ្នាំ២០១៥ ដោយធ្លាក់ចុះ ៣,១ភាគរយ កាលពីខែមុន ធៀបនឹងការធ្លាក់ចុះ ២,២ភាគរយ នៅក្នុងខែមីនា។

គួបញ្ជាក់ថា អាជ្ញាធរចិនបានបង្កើនកិច្ចខិតខំប្រឹងប្រែងរបស់ខ្លួន ចាប់តាំងពីឆ្នាំ២០២២ មក ដើម្បីស្តារឡើងវិញនូវវិស័យអចលនទ្រព្យដែលកំពុងមានវិបត្តិ ខណៈដែលវិស័យនេះ គឺជាកត្តាជំរុញដ៏សំខាន់ដល់សេដ្ឋកិច្ចធំជាងគេបំផុតទី២ របស់ពិភពលោក ប៉ុន្តែការងើបឡើងវិញជាដុំកំភួន មិនបានបង្ហាញឲ្យឃើញច្បាស់លាស់នោះឡើយ។

អាជ្ញាធរកាលពីខែមុន នៅឯកិច្ចប្រជុំការិយាល័យនយោបាយ បានប្តេជ្ញាកែលម្អគោលនយោបាយ ដើម្បីជម្រះបញ្ជីសារពើភណ្ឌលំនៅឋានដែលកំពុងកើនឡើង។ សារព័ត៌មាន Bloomberg News បានរាយការណ៍នៅដើមសប្តាហ៍នេះថា នៅក្នុងការប៉ុនប៉ងចុងក្រោយបំផុតរបស់ខ្លួន អ្នកបង្កើតគោលនយោបាយកំពុងពិចារណាលើសំណើ ដើម្បីឲ្យរដ្ឋបាលក្នុងតំបន់ទូទាំងប្រទេសទិញផ្ទះរាប់លានខ្នងដែលលក់មិនដាច់៕