នៅថ្ងៃសុក្រ (ទី១៧ ខែឧសភា) អំឡុងដំណើរទស្សនកិច្ចនៅប្រទេសចិន ប្រធានាធិបតីរុស្ស៊ី លោក Vladimir Putin (វ្ល៉ាឌីមៀរ ពូទីន) បាននិយាយថា ការយកពន្ធរបស់សហរដ្ឋអាមេរិកលើរថយន្តអគ្គិសនី ដែលផលិតដោយប្រទេសចិន គឺជាឧទាហរណ៍នៃការប្រកួតប្រជែងមិនយុត្តិធម៌។

លោក ពូទីន បាននិយាយថា៖ «ពិតជាគួរឲ្យសោកស្ដាយណាស់ របៀបដែលពិភពលោកដំណើរការសព្វថ្ងៃនេះ ជួនកាលស្ថានភាពតានតឹងកើនឡើង ទាក់ទងនឹងការប្រកួតប្រជែងមិនយុត្តិធម៌។ នេះគឺជារបៀបដែលជនជាតិអាមេរិក ថ្មីៗនេះ បានដាក់ទណ្ឌកម្មលើប្រទេសចិនលើការដឹកជញ្ជូនអគ្គិសនី ពោលគឺលើរថយន្តអគ្គិសនី។ លោកបានបញ្ជាក់បន្ថែមថា៖ «ហេតុអ្វី? ដោយសារតែរថយន្តរបស់ចិនមានគុណភាពកាន់តែល្អប្រសើរជាងមុន»។

សូមបញ្ជាក់ថា លោក ពូទីន កំពុងស្ថិតនៅក្នុងប្រទេសចិន ក្នុងដំណើរទស្សនកិច្ចមួយ ដែលត្រូវបានរៀបចំធ្វើឡើង ដើម្បីពង្រឹងទំនាក់ទំនង រវាងគូប្រជែងដ៏មានឥទ្ធិពលបំផុតទាំង២ របស់សហរដ្ឋអាមេរិក។

គួរបញ្ជាក់បន្ថែមថា ទីក្រុងវ៉ាស៊ីនតោនក្នុងសប្តាហ៍នេះ បានដំឡើងពន្ធលើទំនិញចិនចំនួន ១៨ពាន់លានដុល្លារ ក្នុងនោះរួមទាំងរថយន្តអគ្គិសនី អាគុយ បន្ទះអេឡិចត្រូនិក ដែកថែប អាលុយមីញ៉ូម សារធាតុរ៉ែសំខាន់ៗ បន្ទះសូឡា ជើងស្ទូចនាវានៅសមុទ្រ និងផលិតផលវេជ្ជសាស្រ្ត ខណៈពេលដែលបន្តរក្សាពន្ធគយនៅសម័យរបស់លោក Donald Trump លើទំនិញ ដែលមានតម្លៃជាង ៣០០ពាន់លានដុល្លារ៕