មន្ត្រីបារាំងប្រចាំដែនដី New Caledonia បាននិយាយនៅថ្ងៃសុក្រ (១៧ ឧសភា) នេះថា កងកម្លាំងនគរបាលបារាំង បានចាប់ផ្តើមទៅដល់កោះប៉ាស៊ីហ្វិកនេះហើយ ដោយនេះជាផ្នែកនៃប្រតិបត្តិការដ៏ធំមួយ ដើម្បីគ្រប់គ្រងស្ថានការណ៍នៅរដ្ឋធានី Noumea ឡើងវិញ។

ចំនួននគរបាល និងអាវុធហត្ថនៅលើដែនដីកោះដែលគ្រប់គ្រងដោយបារាំងនេះ នឹងកើនឡើងដល់ ២.៧០០នាក់ នៅល្ងាចថ្ងៃសុក្រ ដោយបង្កើនពីចំនួន ១.៧០០។

គួរបញ្ជាក់ថា បន្ទាប់ពីមានកុបកម្មដែលបានចាប់ផ្តើមកាលពីថ្ងៃចន្ទ រហូតបណ្តាលឲ្យមានអ្នកស្លាប់ ៤នាក់ និងការចាប់ខ្លួនមនុស្សរាប់រយនាក់នោះ កាលពីយប់ថ្ងៃព្រហស្បតិ៍ មានភាពស្ងប់ស្ងាត់បន្តិច។ នេះបើតាមស្នងការជាន់ខ្ពស់របស់ប្រទេសបារាំង លោក Louis Le Franc ដែលបានប្រាប់អ្នកសារព័ត៌មាន នៅក្នុងសន្និសីទសារព័ត៌មានមួយតាមទូរទស្សន៍។

លោកបានប្រាប់ថា នៅមានចំណុចនៃការប្រឈមមុខដាក់គ្នា និងការព្រួយបារម្ភជាច្រើទៀត នៅក្នុងទីក្រុង Noumea។ លោកបានបន្តថា ប្រតិបត្តិការដើម្បីផ្គត់ផ្គង់ស្បៀង និងថ្នាំដល់សាធារណជន នឹងចាប់ផ្តើមដោយក្រុមនានា ក្នុងនោះរួមទាំងក្រុមជំនាញផ្នែកបោសសម្អាតមីន ដែលកំពុងដករបាំងបិទផ្លូវ ដែលត្រូវបានដាក់ដោយក្រុមសកម្មជន។

អាជ្ញាធរបាននិយាយថា កុបកម្មដែលធ្វើឡើងដោយខឹងសម្បានឹងកំណែទម្រង់ការបោះឆ្នោតនោះ បានដុតបំផ្លាញកន្លែងធ្វើអាជីវកម្ម ដុតរថយន្ត ប្លន់ហាង និងដំឡើងរបាំងបិទផ្លូវ ក្នុងរយៈពេល ៣ថ្ងៃនេះ ដោយកាត់ផ្តាច់លទ្ធភាពទទួលបានថ្នាំ និងអាហារ។

រដ្ឋបាលរបស់ដែនដី New Caledonia កាលពីថ្ងៃសុក្រនេះ បានឲ្យដឹងនៅក្នុងសេចក្តីថ្លែងការណ៍មួយថាកោះនេះមានស្តុកស្បៀង សម្រាប់រយៈពេល ២ខែ ហើយបញ្ហា គឺការចែកចាយ។

ប្រទេសបារាំងបានប្រកាសដាក់រដ្ឋក្នុងគ្រាអាសន្ន នៅលើកោះនេះ ដោយដាក់មនុស្សយ៉ាងហោចណាស់ ១០នាក់ឲ្យស្ថិតនៅក្រោមការឃុំខ្លួនក្នុងផ្ទះ និងហាមប្រាមបណ្ដាញសង្គម TikTok៕