កណ្តាល ÷ ឯកឧត្តម គង់ សោភ័ណ្ឌ ប្រធានគណៈកម្មាធិការគណបក្សខេត្តកណ្តាល បានរំលឹកដល់ សមាជិក សមាជិកាទាំងអស់ ដែលមានតួនាតីក្នុងក្រុមប្រឹក្សាឃុំ អញ្ជើញទៅបោះឆ្នោត ជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌឲ្យបានគ្រប់ៗគ្នា ហើយគប្បីបោះឆ្នោតជូនគណបក្សប្រជាជនកម្ពុជា ដែលមានរូបសញ្ញាទេវតាបាចផ្កា។

 ក្នុងឱកាសចុះជួបសំណេះសំណាលជាមួយអង្គបោះឆ្នោតក្រុមប្រឹក្សាឃុំ ក្នុងមុខតំណែង នៅស្រុក មុខកំពូល និងស្រុកពញាឮ ខេត្តកណ្តាលនាថ្ងៃទី១៨ ខែឧសភា ឆ្នាំ២០២៤ម្សិលមិញនេះ ឯកឧត្តម គង់ សោភ័ណ្ឌ បានលើកឡើងថា នៅថ្ងៃទី២៦ ខែឧសភា ឆ្នាំ២០២៤ខាងមុខនេះ គឺជាថ្ងៃបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សា ក្រុង ស្រុក ខណ្ឌ អាណត្តិទី៤ ដែលជាការបោះឆ្នោតមួយដ៏មានសារៈសំខាន់សម្រាប់ការបន្តជំរុញដំណើរការ អភិវឌ្ឍសង្គមជាតិខ្មែរ ពិសេសការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ខណៈការបោះឆ្នោតនេះជាការបោះឆ្នោតអសកល ប៉ុន្តែគឺជាការបោះឆ្នោតដែលកើតចេញពីឆន្ទៈរបស់ប្រជាជនកម្ពុជាពិតប្រាកដព្រោះថាសមាជិកសមាជិកានៃក្រុមប្រឹក្សាឃុំ សង្កាត់ក្នុងតំណែង ដែលជាអ្នកបោះឆ្នោតផ្ទាល់ គឺជាតំណាងរបស់ប្រជាជនដែលបានប្រសូត្រចេញពីឆន្ទៈរបស់ប្រជាជន។

 ឯកឧត្តម បានបន្ថែមទៀតថា ការបោះឆ្នោត ជ្រើសរើសក្រុមប្រឹក្សារាជធានី ខេត្ត ក្រុមប្រឹក្សា ក្រុង ស្រុក ខណ្ឌ អាណត្តិទី៤នេះសម្រាប់ខេត្តកណ្តាល មានស្រុក និងខណ្ឌខ្លះគឺមានគណបក្សចំនួន៤ និង ស្រុក ខណ្ឌខ្លះមានចំនួន៥ ប៉ុន្តែគណបក្សប្រជាជនកម្ពុជាគឺជាគណបក្សដែលនាំមកនូវការអភិវឌ្ឍជាតិ និងនាំប្រទេសជាតិឲ្យមានសុខសន្តិភាព និងភាពរីកចម្រើនរបស់ប្រជាពលរដ្ឋគ្រប់រូបតាំងពីដើមរហូតដល់សព្វថ្ងៃនេះ ដូច្នេះអង្គបោះឆ្នោតទាំងអស់គប្បីត្រូវបន្តបោះឆ្នោតជូនដល់គណបក្សប្រជាជនកម្ពុជា ដែលមានរូបសញ្ញាទេវតាបាចផ្កា។

យ៉ាងណាក៏ដោយ ក្នុងឱកាសជួបសំណេះសំណាលនោះ ឯកឧត្តម គង់ សោភ័ណ្ឌ ក៏បានរំលឹកអង្គបោះឆ្នោតទាំងអស់ ដែលនឹងចូលរួមក្នុងការបោះឆ្នោតអសកលនេះ ត្រូវគោរពអនុវត្តឲ្យបានខ្ជាប់ខ្ជួន តាមច្បាប់បទបញ្ជា នីតិវិធី និងក្រមសីលធម៌នៃការបោះឆ្នោត និងគោរពលទ្ធផលនៃការបោះឆ្នោត ហើយក្នុងនាមជាសមាជិក សមាជិកគណបក្សប្រជាជនត្រូវធ្វើយ៉ាងណារក្សាបរិយាកាសនយោបាយសម្រាប់ការបោះឆ្នោតនេះឲ្យប្រព្រឹត្តទៅប្រកបដោយលក្ខណៈសេរី យុត្តិធម៌ មានសណ្តាប់ធ្នាប់ល្អ និងសុវត្ថិភាពផងដែរ៕

អត្ថបទ ÷ បាន ចក់