នគរបាលបាននិយាយថា គូស្នេហ៍ទេសចរណ៍មួយគូបានរងរបួសនៅក្នុងតំបន់កាស្មៀរ (Kashmir) របស់ប្រទេសឥណ្ឌា បន្ទាប់ពីក្រុមសកម្មប្រយុទ្ធបានបាញ់ប្រហារទៅលើពួកគេកាលពីយប់ថ្ងៃសៅរ៍ (១៨ ឧសភា) មុនពេលការបោះឆ្នោតដែលបានគ្រោងទុកនៅក្នុងតំបន់ដ៏តានតឹង សម្រាប់ការបោះឆ្នោតសកលរយៈពេល ៧ សប្ដាហ៍ ដែលកំពុងបន្តរបស់ប្រទេសឥណ្ឌា។

នគរបាលនៅតំបន់កាស្មៀរ បាននិយាយនៅលើប្រព័ន្ធផ្សព្វផ្សាយសង្គមថា គូស្នេហ៍មកពីទីក្រុង ចៃពួរ (Jaipur) របស់ឥណ្ឌា នេះត្រូវបានជម្លៀសទៅកាន់មន្ទីរពេទ្យ ហើយតំបន់ដែលការវាយប្រហារបានកើតឡើងត្រូវបានបិទ ខណៈស្ថានភាពអ្នកដែលរងរបួសទាំងពីរនាក់នោះមានភាពនឹងនរ។

ប្រទេសឥណ្ឌា កំពុងស្ថិតក្នុងពាក់កណ្តាលនៃការបោះឆ្នោតរបស់ខ្លួន ខណៈអាសនៈដែលនៅសល់ចំនួនពីរនៅតំបន់កាស្មៀរ នឹងត្រូវបោះឆ្នោតនៅថ្ងៃទី២០ និងថ្ងៃទី២៥ ខែឧសភា ខាងមុខនេះ។ គណបក្ស បារ៉ាទីយ៉ា ចាណាតា (BJP) របស់លោកនាយករដ្ឋមន្រ្តី ណារ៉េនដ្រា ម៉ូឌី (Narendra Modi) កំពុងរំលងការបោះឆ្នោតនៅតំបន់ដ៏តានតឹងនេះ ជាលើកដំបូងចាប់តាំងពីឆ្នាំ១៩៩៦ ដោយនិយាយថា ខ្លួននឹងគាំទ្រគណបក្សក្នុងតំបន់ជំនួសវិញ។

គណបក្សធំៗនៅកាស្មៀរ រួមមានបក្សសន្និសីទជាតិ និងបក្សប្រជាធិបតេយ្យប្រជាជន (PDP) បានផ្តោតលើការស្ដារឡើងវិញនូវភាពពាក់កណ្តាលស្វ័យភាពនៃតំបន់នេះនៅក្នុងយុទ្ធនាការរបស់ពួកគេ។ ក្រុមអ្នកវិភាគ និងគណបក្សប្រឆាំងនិយាយថា បក្សកាន់អំណាច BJP មិនប្រកួតប្រជែងការបោះឆ្នោតនៅកាស្មៀរ ទេ ព្រោះបារម្ភថាលទ្ធផលនឹងផ្ទុយពីការរំពឹងទុករបស់ខ្លួន៕