អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា រយៈពេល ៤ថ្ងៃ​ដំណើរ​ការឃោសនាបោះឆ្នោតប្រព្រឹត្តទៅដោយការយោគយល់ និងមិនមានអំពើហិង្សានោះទេ។

ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានប្រាប់ BTV ឱ្យដឹងនៅថ្ងៃទី២០ ខែ​ឧសភា ឆ្នាំ២០២៤ថា ដំណើរការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិទី៤ ដែលបានប្រព្រឹត្តទៅរយៈពេល៣ថ្ងៃ ចាប់ពីថ្ងៃទី១៧ ដល់ថ្ងៃទី១៩ ខែ​ឧសភា ឆ្នាំ២០២៤ ស្ថិតក្នុងបរិយាកាសល្អ និងមិន​មាន​បាតុភា​ព​ណាមួយ​បាន​កើត​ឡើង​ដែល​បង្កការ​រាំងស្ទះដល់ដំណើរការឃោសនានោះទេ។ ឯកឧត្តម បន្តថា ដំណើរការឃោសនា​នេះ​មិន​បាន​ប៉ះពាល់ដល់ជីវភាព និងការរស់នៅរបស់ប្រជាពលរដ្ឋ ពោលគឺគណបក្សនយោបាយទាំង៥ បាន​ធ្វើសកម្មភាពឃោសនារកសំឡេង​គាំទ្រ​ទៅ​តាម​លទ្ធភាព​រៀងៗ​ខ្លួន​ដោយ​មិន​មាន​បង្ក​ជា​អំពើ​ផ្ទុយ​អំពី​ច្បាប់នោះទេ។

អ្នកនាំពាក្យរូបនេះបញ្ជាក់ថា ការឃោសនាបោះឆ្នោតរយៈពេល៣ថ្ងៃនេះ មិនមាន​ពាក្យ​បណ្តឹង​ណាមួ​យបានប្តឹងមកទៅ ខណៈគ.ជ.ប នឹងបន្តតាមដាន​ដោយ​យក​ចិត្ត​ទុក​ដាក់​លើ​សកម្មភា​ព​ឃោសនា​បោះឆ្នោតនឹងរហូតដល់ថ្ងៃបិទបញ្ចប់ គឺថ្ងៃទី២៤ ខែឧសភាខាងមុខ។

ទន្ទឹមនឹងបរិយាកាសនេះ អ្នកនាំពាក្យរូបនេះ បាន​អំពាវ​នាវ​ដល់​គណបក្ស​នយោបាយ​បន្ត​ភាព​ចាស់​ទុំ អនុវត្តតាមច្បាប់ស្តីពីគណបក្សនយោបាយ ព្រមទាំងបទបញ្ជា និងនីតិវិធី ជាពិសេស​ក្រម​សីលធ​ម៌​មានចែងក្នុងច្បាប់ស្តីពីគណបក្សនយោបាយ និងបេក្ខជនឈរឈ្មោះបោះឆ្នោត។

សូមជម្រាបថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិ​ទី៤ នឹងប្រព្រឹត្តទៅនាថ្ងៃទី២៦ ខែឧសភា ឆ្នាំ២០២៤ និងមានអង្គបោះឆ្នោតជាក្រុមប្រឹក្សាឃុំ-សង្កាត់​ក្នុងមុខតំណែងសរុបនៅទូទាំងប្រទេសចំនួន ១១,៦២២នាក់។ ការបោះឆ្នោត​ខាង​មុខ​នេះ​មាន​គណបក្សនយោបាយចំនួន៥ចូលរួម រួមមាន៖ គណបក្សប្រជាជនកម្ពុជា, គណបក្ស​ឆន្ទៈ​ខ្មែរ, គណបក្សកម្លាំងជាតិ, គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ៕ អត្ថបទ សេក ឧត្តម