អាជ្ញាធរសុខាភិបាលក្នុងតំបន់ប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យ (១៩ ឧសភា) ថា ចំនួនអ្នកស្លាប់របស់ប៉ាឡេស្ទីន ពីការវាយប្រហារដែលកំពុងបន្តរបស់អ៊ីស្រាអែល ទៅលើតំបន់ហ្កាហ្សាស្ទ្រីប បានកើនឡើងដល់ជាង ៣៥.៤០០ នាក់។

សេចក្តីថ្លែងការណ៍នោះបាននិយាយថា ក្នុងរយៈពេល ២៤ ម៉ោងកន្លងមក កងទ័ពអ៊ីស្រាអែលបានសម្លាប់ជនជាតិប៉ាឡេស្ទីន ៧០ នាក់ និងបង្ករបួស ១១០ នាក់ផ្សេងទៀត ដែលនាំឱ្យចំនួនអ្នកស្លាប់សរុបកើនឡើងដល់ ៣៥.៤៥៦ នាក់ និងអ្នករបួសជាង ៧៩.០០០ ចាប់តាំងពីជម្លោះប៉ាឡេស្ទីន និងអ៊ីស្រាអែលបានផ្ទុះឡើងកាលពីខែតុលា ឆ្នាំមុនមក។

អាជ្ញាធរសុខាភិបាលនេះបានសង្កត់ធ្ងន់ថា បុគ្គលិកសង្គ្រោះបន្ទាន់ផ្នែកវេជ្ជសាស្រ្ដ និងបុគ្គលិកការពារជនស៊ីវិលកំពុងប្រឈមមុខនឹងបញ្ហាក្នុងប្រតិបត្តិការជួយសង្គ្រោះ ខណៈដែលជនរងគ្រោះមួយចំនួនធំត្រូវបានកប់នៅក្រោមគំនរបាក់បែក។

កងកម្លាំងការពារអ៊ីស្រាអែល (IDF) កាលពីថ្ងៃអាទិត្យ បាននិយាយនៅក្នុងសេចក្តីថ្លែងការណ៍មួយថា ក្នុងរយៈពេលមួយថ្ងៃកន្លងមកនេះ កងទ័ពអ៊ីស្រាអែលបានបន្តប្រតិបត្តិការយោធានៅក្នុងទីក្រុងរ៉ាហ្វា (Rafah) ភាគខាងត្បូងហ្កាហ្សា និងជំរំ ចាបាលីយ៉ា (Jabalia) នៅភាគខាងជើង ដោយបានបើកការវាយប្រហាររាប់សិបដងប្រឆាំងនឹងបុគ្គលិកប្រដាប់អាវុធនៅជំរំភៀសខ្លួននេះ ហើយបានសម្លាប់បុគ្គលប្រដាប់អាវុធជាច្រើននាក់៕