ភ្នំពេញ ៖ ក្រសួងបរិស្ថានបានគូសបញ្ជាក់ថា ក្រសួងកំពុងតែបង្កើតកម្មវិធី (App) សម្រាប់ បង្កើន ប្រសិទ្ធភាព គ្រប់គ្រង តំបន់ ការពារ ធម្មជាតិ តាម រយៈ កម្មវិធី នៅ លើ ទូរស័ព្ទ ដៃ ដោយមិនមានសេវាអ៊ីនធឺណេតក៍អាចប្រើបានដែរ ដើម្បី ឲ្យចូលរួម ការពារ និង បញ្ចៀស ការ ចូល ទៅ ទន្ទ្រាន កាន់កាប់ ដី ដោយ ខុស ច្បាប់ នៅ តំបន់ ការពារ ធម្មជាតិ។ បន្ថែមពីនេះ ក្រសួងក៏នឹងអនុវត្តច្បាប់យ៉ាងម៉ឺងម៉ាត់ផងដែរ ចំពោះអ្នកប្រព្រឹត្តបទល្មើសនានាដោយមិនលើកលែងជាដាច់ខាត។     

ថ្លែងក្នុងសន្នីសីទសារព័ត៌មាននាថ្ងៃទី២០ ខែឧសភា ឆ្នាំ ២០២៤នៅទីស្តីការក្រសួងបរិស្ថានឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថានបានគូសបញ្ជាក់ថា ក្រសួងបរិ ស្ថាន នឹងអនុវត្តយ៉ាងម៉ឺងម៉ាត់ចំពោះអ្នកប្រព្រឹត្តិបទល្មើសនានាតាមច្បាប់កម្ពុជាដែលមានដោយមិនលើកលែងជា ដាច់ខាត។ ឯកឧត្តមរដ្ឋមន្ត្រីបានលើកឡើងថា ក្រសួងនឹងធ្វើការជាមួយសមត្ថកិច្ច ជាមួយគណៈមេធាវីដើម្បីដាក់មេធាវីការពារក្រសួងរាល់បទល្មើសដែលជនល្មើសបានប្រព្រឹត្តិ។ ដោយឯកឧត្តមរដ្ឋមន្ត្រីបន្ថែមថាក្រសួងនឹងអនុវត្តច្បាប់ឲ្យបាន ១០០% និងជំរុញឲ្យមានការអនុវត្តច្បាប់ផ្សេងៗទៀត ។ បន្ថែមពីនេះក្រសួងនឹងធ្វើការសហការជាមួយអាជ្ញាធរដែនដី ក្នុងការទប់ស្កាត់រាល់បទល្មើសនានាដែលមានកើតក្នុងដែនដីទាំងនោះ ។ 

ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងបន្តថាដើម្បីបង្កើន កិច្ចការពារ នៅតំបន់ការពារធម្មជាតិឲ្យទទួលបានជោគជ័យនោះ ក្រសួងបរិស្ថានបានដាក់ចេញ វិធានការដោយសហការ ជាមួយមន្រ្តីថ្នាក់ក្រោមជាតិក្នុងនោះក៏មានការប្រើប្រាស់ ទិន្នន័យពីផ្កាយរណប និង ការប្រើប្រាស់ដ្រូនដើម្បី គ្រប់គ្រងតំបន់ការពារ ធនធានធម្មជាតិឲ្យមានតាមរយៈទិន្នន័យពីផ្កាយរណប និង ការផ្តល់ដ្រូនដល់មន្រ្តីមូលដ្ឋានអាចសិក្សា និងទទួលបានព័ត៌មានពីទីតាំងដែលមានការចូលទន្ទ្រានកាន់កាប់ដោយខុសច្បាប់ និង អាចទប់ស្កាត់បានទាន់ពេលវេលា។​ឯកឧត្តម បានបន្តថាដោយថ្មីៗនេះក្រសួងបរិស្ថានក៏បានប្រគល់ផែនទីតំបន់ការពារធម្មជាតិដល់ រដ្ឋបាលថ្នាក់ក្រោមជាតិដែលជាយន្តការមួយដើម្បីពង្រឹងការគ្រប់គ្រងតំបន់ការពារធម្មជាតិឲ្យកាន់តែមានប្រសិទ្ធភាពបន្ថែមទៀត។ តាមរយៈផែនទីបានកំណត់យ៉ាងច្បាស់លាស់ពាក់ព័ន្ធទីតាំងដីនៅតំបន់ការពារធម្មជាតិតំបន់ណាដែលពាក់ព័ន្ធ ឬ មិនពាក់ព័ន្ធតំបន់ ដែលត្រូវការពារ។ឯកឧត្តម អ៊ាង សុផល្លែត បានបញ្ជាក់បន្តថាដើម្បីគ្រប់គ្រងតំបន់ការពារធនធានធម្មជាតិឲ្យកាន់តែមាន ប្រសិទ្ធភាពនោះ ក្រសួង បរិស្ថានក៏បង្កើតកម្មវិធី (App) សម្រាប់ បង្កើន ប្រសិទ្ធភាពគ្រប់គ្រងតំបន់ការពារធម្មជាតិតាមរយៈ កម្មវិធី នៅលើទូរស័ព្ទដៃដោយមិនមានសេវាអ៊ីនធឺណេតក៍អាចប្រើបានដែរ ។ ជាមួយគ្នានេះពលរដ្ឋក៏អាចទាញកម្មវិធីនេះយកទៅប្រើប្រាស់ដើម្បី ចូលរួមការពារ និង បញ្ចៀសការចូលទៅទន្ទ្រានកាន់កាប់ដីដោយខុសច្បាប់នៅតំបន់ការពារ ធម្មជាតិ។

តាមរបាយការណ៍ ពី ក្រសួងបរិស្ថានតំបន់ការពារធម្មជាតិក្នុង ប្រទេសកម្ពុជាបានកើនឡើងពីចំនួន២៣ តំបន់ដែលមានផ្ទៃដីសរុបប្រមាណ ៣,៣ លានហិកតា ស្មើនឹង១៨% នៃផ្ទៃដីប្រទេស នាឆ្នាំ១៩៩៣ដល់ចំនួន ៧៣ តំបន់ ដែលមានផ្ទៃដីសរុបជាង ៧ លានហិកតា ស្មើនឹង ៤០% នៃផ្ទៃប្រទេសនាពេលបច្ចុប្បន្ន។

បន្ថែមពីនេះឯកឧត្តមរដ្ឋមន្រ្តីក្រសួងបរិស្ថាន ក៍បានជំរុញឱ្យមានការចូលរួមពីភាគីពាក់ព័ន្ធ និងដៃគូសហការទាំង អស់ តាមបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ពង្រឹងប្រសិទ្ធភាពគ្រប់គ្រងតំបន់ ការពារធម្មជាតិ ដោយអនុលោម យុទ្ធសាស្រ្តចក្រាវិស័យបរិស្ថាន ២០២៣- ២០២៨ ដើម្បីឆ្លើយតបទៅនឹងការប្រែ ប្រួលអាកាសធាតុ និងលើកកម្ពស់សេដ្ឋកិច្ចបៃតង ដោយជំរុញសម្រេចគោលដៅកម្ពុជាគឺ «ជាប្រទេសអព្យាក្រឹតកាបូន និងមានគម្របព្រៃឈើ៦០% នៅឆ្នាំ២០៥០» ។ទន្ទឹមនិងនោះឯកឧត្តមក៍បានស្នើឲ្យបញ្ឈប់នៃការទិញកូនឈើ ដោយប្តូរមកជាការនាំគ្នាបណ្តុះនិងដាំកូនឈើឲ្យបានកាន់ តែច្រើនឡើងវិញ ៕

អត្ថបទ ៖ ភារម្យ