បុព្វជិត និងអ្នកកាន់ទុក្ខនៅប្រទេសអ៊ីរ៉ាក់ បានចូលរួមរំលែកទុក្ខនៅស្ថានទូតអ៊ីរ៉ង់ ក្នុងទីក្រុងបាដាដ និងស្ថានកុងស៊ុលអ៊ីរ៉ង់ នៅទីក្រុង Basra កាលពីថ្ងៃចន្ទ បន្ទាប់ពីប្រធានាធិបតីអ៊ីរ៉ង់ លោក អ៊ីប្រាហ៊ីមរ៉េស៊ី(Ebrahim Raisi) បានទទួលមរណៈភាព ក្នុងឧបទ្ទវហេតុធ្លាក់ឧទ្ធម្ភាគចក្រនៅតំបន់ភ្នំក្បែរព្រំដែនជាមួយប្រទេសអាសែរបៃហ្សង់។

មន្ត្រី និងប្រព័ន្ធផ្សព្វផ្សាយរដ្ឋ បាននិយាយកាលពីថ្ងៃចន្ទថា ប្រធានាធិបតីអ៊ីរ៉ង់លោក Ebrahim Raisi ដែលជាអ្នកប្រកាន់តឹង ត្រូវបានគេមើលឃើញថាជាអ្នកបន្តតំណែងដ៏មានសក្តានុពលរបស់មេដឹកនាំកំពូលលោក អាយ៉ាតូឡា អាលី ខាមីណេ( Ayatollah Ali Khamenei) បានទទួលមរណៈភាព នៅពេលដែលឧទ្ធម្ភាគចក្ររបស់លោក បានធ្លាក់ដោយសារអាកាសធាតុមិនអំណោយផល។ បំណែកនៃឧទ្ធម្ភាគចក្រធ្លាក់ ដែលដឹកលោកRaisi រដ្ឋមន្ត្រីការបរទេសលោក ហូសេន អាមីរ៉ាបដូឡាហៀន(Hossein Amirabdollahian) និងមន្ត្រីរួមដំណើរ ព្រមទាំងសមាជិកយានិក៦នាក់ផ្សេងទៀត ត្រូវបានរកឃើញកាលពីព្រឹកថ្ងៃចន្ទ បន្ទាប់ពីការស្វែងរកពេញមួយយប់ក្នុងស្ថានភាពព្យុះភ្លៀង។

ទីភ្នាក់ងារសារព័ត៌មាន IRNA ផ្លូវការបានរាយការណ៍ថា មេដឹកនាំកំពូល លោក Khamenei ដែលកាន់ តំណែងខ្ពស់បំផុត បាននិយាយពីគោលនយោបាយការបរទេស និងកម្មវិធីនុយក្លេអ៊ែររបស់អ៊ីរ៉ង់ថា អនុប្រធានាធិបតីទីមួយ លោក Mohammad Mokhber នឹងឡើងកាន់តំណែងជាប្រធានាធិបតីបណ្តោះអាសន្ន។

មេដឹកនាំសាសនារបស់អ៊ីរ៉ង់ ប្រឈមមុខទៅនឹងសម្ពាធអន្តរជាតិជុំវិញកម្មវិធីនុយក្លេអ៊ែរដែលមានជម្លោះរបស់ទីក្រុងតេអេរ៉ង់ និងការធ្វើឱ្យទំនាក់ទំនងយោធាកាន់តែស៊ីជម្រៅជាមួយប្រទេសរុស្ស៊ី ក្នុងអំឡុងសង្គ្រាមនៅអ៊ុយក្រែន។

ចាប់តាំងពីក្រុមហាម៉ាស ដែលជាសម្ព័ន្ធមិត្តរបស់អ៊ីរ៉ង់ បានវាយប្រហារអ៊ីស្រាអែលកាលពីថ្ងៃទី៧ ខែតុលា បង្កឱ្យមានការវាយលុករបស់អ៊ីស្រាអែលលើតំបន់ហ្កាហ្សា ដែលការប៉ះទង្គិចគ្នាមានជាប់ពាក់ព័ន្ធជាមួយក្រុមសម្ព័ន្ធមិត្តអ៊ីរ៉ង់ បានផ្ទុះឡើងនៅពាសពេញមជ្ឈិមបូព៌ា។