ភាគខាងជើងប្រទេសឥណ្ឌា រួមទាំងរដ្ឋធានីដេលី (Delhi)កំពុងបន្តទទួលរងរលកកម្ដៅដ៏ក្ដៅ ស្របពេលសីតុណ្ហភាពកើនឡើងជាង៤៥អង្សាសេកាលពីចុងសប្តាហ៍នេះ។

កាលពីថ្ងៃអាទិត្យ ស្រុក ណាចាហ្កា (Najafgarh) ក្នុងរដ្ឋធានីដេលី បានកត់ត្រាសីតុណ្ហភាព៤៧,៨អង្សាសេ ជាកម្រិតខ្ពស់បំផុតនៅក្នុងប្រទេសអំឡុងរដូវកាលនេះ។នាយកដ្ឋានអាកាសធាតុ បាននិយាយថាកម្ដៅទំនងជានឹងបន្តនៅសប្តាហ៍នេះ។

ការហក់ឡើងខ្ពស់នៃរលកកម្ដៅនេះ បានកើតឡើង ស្របពេលប្រទេសឥណ្ឌាកំពុងរៀបចំការបោះឆ្នោតសកលរបស់ខ្លួន ដែលលទ្ធផលនឹងត្រូវប្រកាសនៅថ្ងៃទី ៤ ខែមិថុនា។រដូវក្តៅរបស់ប្រទេសឥណ្ឌា ដែលមានរយៈពេលចាប់ពីខែមីនា ដល់ខែកញ្ញា តាមធម្មតាក្តៅហើយសើម។

នាយកដ្ឋានឧតុនិយមឥណ្ឌា (IMD) បាននិយាយថា ប្រទេសនេះទំនងជាជួបប្រទះរលកកម្ដៅយូរជាង និងកាន់តែខ្លាំងនៅឆ្នាំនេះ។

នាយកដ្ឋានឧតុនិយមនេះ បានព្យាករណ៍ថា សីតុណ្ហភាពអតិបរិមានៅរដ្ឋធានី ដេលី និងទីក្រុងភាគខាងជើងផ្សេងទៀត ទំនងជានឹងឡើងពី៤៥ទៅ៤៦អង្សាសេ នៅថ្ងៃចន្ទ និងថ្ងៃអង្គារសប្ដាហ៍នេះ។

ប្រភពដដែលនេះ ក៏បានព្យាករណ៍ផងដែរថានឹងមានកំម្ដៅថ្មីលើផ្នែកនៃភាគខាងលិច និងកណ្តាលរបស់ប្រទេសឥណ្ឌាក្នុងរយៈពេលប៉ុន្មានថ្ងៃខាងមុខនេះ។

រដ្ឋជាច្រើនរបស់ឥណ្ឌា ដែលកំពុងស្ថិតក្រោមរលកកម្តៅ ក៏កំពុងទៅបោះឆ្នោតនៅសប្តាហ៍នេះដែរ។កាលពីថ្ងៃចន្ទដើមសប្ដាហ៍នេះ អ្នកបោះឆ្នោតរាប់លាននាក់បានបោះឆ្នោតនៅក្នុងរដ្ឋ មហារាស្ត្រ(Maharashtra) រដ្ឋ ឧតាប្រទេស (Uttar Pradesh) និងរដ្ឋប៊ីហា ( Bihar) ខណៈរដ្ឋធានី ដេលី នឹងបោះឆ្នោតនៅថ្ងៃទី ២៥ ខែឧសភាខាងមុខនេះ៕