រដ្ឋាភិបាលអ៊ុយក្រែន បានអំពាវនាវឱ្យប្រជាជនមានការប្រុងប្រយ័ត្នប្រឆាំងព័ត៌មានក្លែងក្លាយ របស់រុស្ស៊ី ដែលចោទសួរពីភាពស្របច្បាប់នៃតំណែងប្រធានាធិបតីរបស់លោក Volodymyr Zelenskyy។ អាណត្តិរយៈពេលប្រាំឆ្នាំរបស់ លោក Zelenskyy ជាប្រធានាធិបតី ត្រូវបានគេសន្មត់ថាបានបញ្ចប់កាលពីថ្ងៃចន្ទ ប៉ុន្តែលោកនៅតែបន្តកាន់តំណែង។ ការបោះឆ្នោតប្រធានាធិបតី ដែលគ្រោងធ្វើកាលពពីខែមីនា ពុំបានកើតឡើងនោះទេ ក្នុងពេលច្បាប់អាជ្ញាសឹកត្រូវបានដាក់ បន្ទាប់ពីរុស្ស៊ី ចាប់ផ្តើមការវាយលុកលើអ៊ុយក្រែន។

អង្គភាពសេវាចារកម្មបរទេសរបស់រុស្ស៊ី បាននិយាយនៅក្នុងសេចក្តីថ្លែងការណ៍កាលពីថ្ងៃចន្ទថា ការគាំទ្រសម្រាប់ លោក Zelenskyy ពីពលរដ្ឋអ៊ុយក្រែន កំពុងធ្លាក់ចុះជាបន្តបន្ទាប់។ ទីភ្នាក់ងារនេះ បាននិយាយថា ប្រធានាធិបតីអ៊ុយក្រែន មានអារម្មណ៍ថាតំណែងរបស់លោកងាយរងគ្រោះ ហើយលោកកំពុងព្យាយាមយ៉ាងខ្លាំងដើម្បីបណ្តេញនរណាម្នាក់ដែលលោកមិនអាចពឹងផ្អែកបាន នៅមុនពេលចុងបញ្ចប់នៃអាណត្តិរបស់លោក។ ប៉ុន្តែការស្ទង់មតិកាលពីខែកុម្ភៈ ធ្វើឡើងដោយវិទ្យាស្ថានសង្គមវិទ្យាអន្តរជាតិទីក្រុងគីវ ជាក្រុមហ៊ុនស្ទង់មតិមតិរបស់អ៊ុយក្រែន បានរកឃើញថា៦៩ភាគរយនៃប្រជាជន គិតថា លោក Zelenskyy គួរតែបន្តកាន់តំណែងរហូតដល់ច្បាប់អាជ្ញាសឹក ត្រូវបានដកចេញ។

មជ្ឈមណ្ឌលប្រឆាំងព័ត៌មានក្លែងក្លាយរបស់អ៊ុយក្រែន កាលពីថ្ងៃចន្ទបានជំរុញឱ្យមានការប្រុងប្រយ័ត្នប្រឆាំងព័ត៌មានមិនពិត ដែលផ្សព្វផ្សាយដោយប្រទេសរុស្ស៊ី។ មជ្ឈមណ្ឌល និយាយថា រុស្ស៊ីសង្ឃឹមថានឹងបង្កវិបត្តិនយោបាយ ដើម្បីធ្វើឱ្យការគាំទ្រពីអន្តរជាតិចុះខ្សោយសម្រាប់អ៊ុយក្រែន ព្រមទាំងធ្វើឱ្យអន្តរាយដល់សមត្ថភាពការពាររបស់ប្រទេសនេះ។ ក្រសួងការពារជាតិរុស្ស៊ី បាននិយាយថា កងទ័ពរបស់ខ្លួននៅក្នុងតំបន់ Luhansk បានដណ្តើមការគ្រប់គ្រងទីក្រុង Bilohorivka ជាទីតាំងលំនៅ ដែលកងកម្លាំងអ៊ុយក្រែន ដណ្តើមបានមកវិញកាលពីខែកញ្ញា ឆ្នាំ២០២២។ ប៉ុន្តែ យោធាអ៊ុយក្រែន បានបដិសេធរឿងនេះ ដោយនិយាយនៅលើបណ្តាញសង្គមថា ទាហានរបស់ពួកគេកំពុងទប់ទល់ការវាយលុករបស់សត្រូវ។