បន្ទាយមានជ័យ៖ នៅថ្ងៃទី២១ ខែឧសភា ឆ្នាំ២០២៤ ឯកឧត្តម អ៊ុំ រាត្រី អភិបាល​ខេត្ត​បន្ទាយ​មានជ័យ បានអញ្ជើញក្នុងពិធីបិទវគ្គហ្វឹកហ្វឺនប្រចាំឆមាសទី១ ឆ្នាំ២០២៤ ដោយពិធី​នេះ​មាន​ការ​ចូលរួម​ពី​មេបញ្ជាការរង នាយសេនាធិលារ យោធភូមិភាគទី៥ លោកមេ​បញ្ជាការ​កង​រាជ​អាវុធ​ហត្ថ​ខេត្ត លោកស្នងការនគរបាលខេត្ត តំណាងប្រតិបត្តិការសឹករងខេត្ត និងតំណាង​កងពល​តូចថ្មើរ​ជើង​លេខ៥១។

ក្នុងពិធីបិទវគ្គហ្វឹកហ្វឺន ឯកឧត្តម អ៊ុំ រាត្រី អភិបាលខេត្ត មានប្រសាសន៍ថា រាជរដ្ឋាភិបាល នីតិកាល​ទី៧ បានធ្វើការកំណែទម្រង់ និងការធ្វើទំនើបកម្មកងទ័ព ក្រោមការ​ដឹកនាំ​របស់​សម្ដេច​មហាបវរ​ធិបតី ហ៊ុន ម៉ាណែត នាយករដ្ឋមន្ត្រី តែងតែយកចិត្ត​ទុកដាក់​ខ្ពស់​អំពី​ការ​ពង្រឹង​ទៅ​លើ​សុខ​សន្តិភាព ស្ថិរភាពសង្គម ដើម្បីបន្តធានាបអំពីនិរន្តរភាពសុខសន្តិភាព និងស្ថេរភាព​ដែល​មាន​ក្នុង​ពេល​បច្ចុប្បន្ន។

ឯកឧត្តម មានប្រសាសន៍ទៀតថា ក៏បានថ្លែង​នូវ​ការ​កោតសរសើរដល់ការខិតខំប្រឹងប្រែង​របស់​យោធា​ចារ្យ ដែលបានយកអស់កម្លាំងកាយ ចិត្ត និងចំណេះដឹង​ផ្តល់នូវការ​យល់​ដឹង​ដល់​សិក្ខាកាម នេះគឺជាការរំលឹក និងជាការបង្កើននូវសមត្ថភាពយល់ដឹង ក៏ដូចជាការ​ពង្រឹង​នូវ​កាយ​សម្បទា​ដល់​កងកម្លាំង ដើម្បីឱ្យមានភាពរឹងមាំ ស្វាហាប់ ក្នុងការអនុវត្តតួនាទី ភារកិច្ចរបស់ខ្លួន (ទាំងកម្លាំងអាវុធហត្ថ ទាំងកម្លាំងនគរបាល និងកងទ័ព ត្រូវមានកម្រិតយល់ដឹងខ្ពស់ មាន កាយ​សម្បទារឹងមាំ ស្វាហាប់ និងរហ័សរហួន ) ។

ឯកឧត្តម អ៊ុំ រាត្រី បានបន្តថា បច្ចុប្បន្ន ថ្វីត្បិតតែប្រទេសយើងមានសុខសន្តិភាពពេញលេញ ប៉ុន្តែ​ការ​អភិវឌ្ឍសមត្ថភាពកងទ័ព គឺពិតជាត្រូវធ្វើឱ្យបានជាប់ជាប្រចាំ ដើម្បីត្រៀម​ស្មារតី​ដោះ​ស្រាយ​នូវ​គ្រប់​សភាពការណ៍ ជាពិសេសក្នុងការងារគ្រោះមហន្តរាយទាំងបង្កដោយមនុស្ស និងដោយ​ធម្មជាតិ​ផ្សេងៗទៀតផង។ កងទ័ពគឺមិនត្រឹមតែជាកម្លាំងស្នូល ទទួលរ៉ាប់រងការងារថែរក្សា សន្តិសុខ សណ្តាប់ធ្នាប់ ការពារបូរណភាពទឹកដីប៉ុណ្ណោះទេ គឺជាកម្លាំង​យ៉ាង​រឹង​មាំ​ក្នុង​ការ​ជួយ​សង្រ្គោះ​ដល់ប្រជាពលរដ្ឋ ក្នុងគ្រាអាសន្នពីគ្រោះមហន្តរាយផ្សេងៗ ប្រកបដោយ​ភាព​កក់ក្តៅ​ និង​ទំនុក​ចិត្ត​ពីប្រជាពលរដ្ឋផងដែរ៕