ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បាននិយាយកាលពីថ្ងៃអង្គារ (២១ ឧសភា) ថា ការចែកចាយជំនួយស្បៀងអាហារនៅក្នុងទីក្រុងរ៉ាហ្វា (Rafah) ភាគខាងត្បូងនៃតំបន់ហ្កាហ្សា បច្ចុប្បន្នត្រូវបានផ្អាកដោយសារតែខ្វះការផ្គត់ផ្គង់ និងអសន្តិសុខ។

ទីភ្នាក់ងារជំនួយ UNRWA នេះបាននិយាយនៅក្នុងសេចក្តីថ្លែងការណ៍មួយនៅលើបណ្ដាញសង្គម X ថាមានតែមណ្ឌលសុខភាពចំនួន ៧ ទីតាំងប៉ុណ្ណោះក្នុងចំណោមមណ្ឌលសុខភាពទាំង ២៤ របស់ខ្លួនដែលកំពុងដំណើរការ ហើយថាមន្ទីរពេទ្យទាំងនោះមិនបានទទួលការផ្គត់ផ្គង់ផ្នែកវេជ្ជសាស្រ្តណាមួយនោះទេក្នុងរយៈពេល ១០ ថ្ងៃចុងក្រោយនេះ ដោយសារតែ «ការបិទ ឬការរំខាន» នៅច្រកឆ្លងកាត់ រ៉ាហ្វា និងច្រក កេរឹម សាលូម (Kerem Shalom) ចូលទៅក្នុងហ្កាហ្សា។

អ៊ីស្រាអែល បានបង្កើនការវាយរុញថ្មីមួយនៅកណ្តាលតំបន់ហ្កាហ្សា កាលពីថ្ងៃចន្ទ ដោយទម្លាក់គ្រាប់បែកលើភូមិនានានៅភាគខាងជើងនៃតំបន់ហ៊ុមព័ទ្ធប៉ាឡេស្ទីនមួយនេះ ហើយនិយាយថា ខ្លួនមានបំណងពង្រីកប្រតិបត្តិការនៅក្នុងទីក្រុងរ៉ាហ្វា ទោះបីជាមានការព្រមានរបស់សហរដ្ឋអាមេរិក អំពីហានិភ័យនៃការស្លាប់ និងរបួសដ៏ច្រើននៅក្នុងទីក្រុងភាគខាងត្បូងក៏ដោយ។

ការវាយលុករបស់អ៊ីស្រាអែល ក្នុងពេលដំណាលគ្នានៅចុងភាគខាងត្បូង និងភាគខាងជើងនៃតំបន់ហ្កាហ្សា ដែលគ្រប់គ្រងដោយក្រុមហាម៉ាស ក្នុងខែនេះ បានបណ្តាលឱ្យមានការភៀសខ្លួនថ្មីនៃមនុស្សរាប់សែននាក់ចេញពីផ្ទះសម្បែងរបស់ពួកគេ ហើយបានរឹតបន្តឹងយ៉ាងខ្លាំងដល់លំហូរនៃជំនួយ ដែលបង្កើនហានិភ័យនៃគ្រោះទុរ្ភិក្សកាន់តែធ្ងន់ធ្ងរ៕