គិតក្នុងរយៈពេល៩ខែ ក្រោយការដឹកនាំរបស់រាជរដ្ឋាភិបាលអាណត្តិទី៧ សម្តេចនាយករដ្ឋមន្រ្តី ហ៊ុន ម៉ាណែត បានខិតខំធ្វើសកម្មភាពទាំងក្នុងនិងក្រៅប្រទេសដើម្បីលើកទឹកចិត្តអ្នកវិនិយោគទុន។ ជាលទ្ធផល កម្ពុជាបានទាក់ទាញគម្រោងវិនិយោគថ្មីចំនួន១៤៧ ទុនវិនិយោគចំនួន ២,៧០០លានដុល្លារ និងបង្កើតការងារចំនួនជាង ១៤ម៉ឺនកន្លែង ជូនដល់ប្រជាពលរដ្ឋ។

នៅក្នុងវេទិកាសារព័ត៌មានលើកទី៣ ដើម្បីបង្ហាញពីវឌ្ឍនភាពរបស់រាជរដ្ឋាភិបាលបន្តវេន ដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី២០ ខែឧសភាកន្លងទៅ ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអ្នកនាំពាក្យរាជរដ្ឋាភិបាល បានមានប្រសាសន៍ថា យោងតាមវិទ្យាស្ថានមួយរបស់ប្រទេសឥណ្ឌូនេស៊ី បានព្យាករណ៍ ដោយនៅឆ្នាំ២០២៤នេះ សន្ទុះសេដ្ឋកិច្ចរបស់កម្ពុជា បានហក់ឡើងខ្ពស់ជាងគេចំណាត់ថ្នាក់ទី១ នៃប្រទេសក្នុងតំបន់អាស៊ាន ហើយចំណាត់ថ្នាក់ទី៣ ក្នុងចំណោមប្រទេសចំនួន២០ នៅតំបន់អាស៊ី ដែលគេចាត់ទុកថា មានសេច្ចកិច្ចលូតលាស់ខ្លាំង ក្រោយពីវិបត្តិកូវីដ-១៩ ក្នុងអត្រា ៦,១% នៅឆ្នាំ២០២៤នេះ ។

 ឯកឧត្តមបានបន្តថា ទន្ទឹមនឹងការព្យាករណ៍នេះ រាជរដ្ឋាភិបាលអាណត្តិថ្មី ដែលបន្តមកពីជំនាន់សម្ដេចតេជោ ហ៊ុន សែន អតីតនាយករដ្ឋមន្ត្រី បានធ្វើពិពិធកម្មសេដ្ឋកិច្ច រួមទាំងការប្រកួតប្រជែង តាមរយៈការបង្កើតនូវបូលសេដ្ឋកិច្ច ខណៈបច្ចុប្បន្ននៅកម្ពុជា មានប៉ូលសេដ្ឋកិច្ចចំនួន៥ រួមមាន៖ រាជធានីភ្នំពេញ ខេត្តព្រះសីហនុ ខេត្តសៀមរាប ប៉ែកពាយ័ព្យ និងប៉ែកឦសាន្ត។

ឯកឧត្តម ប៉ែន បូណា បានបញ្ជាក់បន្ថែមថា គ្រប់គោលនយោបាយអភិវឌ្ឍប្រទេស គឺរាជរដ្ឋាភិបាល មិនមើលរំលងឡើយការរក្សាភាពធន់ ចីរភាព និងបរិយាប័ន្ន មានន័យថា ធ្វើយ៉ាងណាឱ្យការអភិវឌ្ឃប្រទេសមានភាពធន់ ចីរភាពយូរអង្វែង និងមានការចូលរួមពីប្រជាពលរដ្ឋ ហើយមានការបែងចែកភាគផលដោយសមធម៌៕ អត្ថបទ ឈិត បូរ៉ាវី