អ្នកសារព័ត៌មានជនជាតិចិនម្នាក់ ដែលជាប់ពន្ធនាគារពីបទការរាយការណ៍អំពីការផ្ទុះឡើងវីរុសកូរ៉ូណា នៅទីក្រុង Wuhan ប្រទេសចិន ត្រូវបានដោះលែងវិញហើយ បន្ទាប់ពីបានជាប់ទោសរួចមក។ កាលពីឆ្នាំ ២០២០ លោកស្រី Zhang Zhan អតីតមេធាវី មកពីទីក្រុងសៀងហៃ បានធ្វើដំណើរទៅកាន់ទីក្រុង Wuhan ស្ថិតនៅក្នុងខេត្ត Hubei របស់ប្រទេសចិន។ លោកស្រី បានបង្ហោះលើគណនីផ្ទាល់ខ្លួនតាមប្រព័ន្ធអ៊ីនធឺណិត អំពីពលរដ្ឋ រួមមានទាំងអ្នកទាំងឡាយដែលត្រូវបង្ខំឲ្យរស់នៅយ៉ាងលំបាក។

លោកស្រី បានចែករំលែកការរាយការណ៍អំពីការឆ្លើយតបរបស់អាជ្ញាធរចំពោះការផ្ទុះឡើង វីរុស។

ប៉ុន្តែលោកស្រី ត្រូវបានអាជ្ញាធរឃាត់ខ្លួន ពីបទផ្សព្វផ្សាយព័ត៌មានមិនពិត។

តុលាការ បានកាត់ទោសលោកស្រី Zhang ឱ្យជាប់ពន្ធនាគាររយៈពេល៤ឆ្នាំ ពីបទធ្វើឲ្យប៉ះពាល់ដល់សណ្តាប់ធ្នាប់សាធារណៈ។ ការចេញសេចក្តីសម្រេចរបស់តុលាការ បង្កឱ្យមានការរិះគន់ពីអន្តរជាតិ។ រដ្ឋាភិបាលសហរដ្ឋអាមេរិក បានចេញសេចក្តីថ្លែងការណ៍ថ្កោលទោសយ៉ាងខ្លាំងចំពោះសេចក្តីសម្រេចនេះ។ លោកស្រី Zhang បានរួចផុតការជាប់ទោសរបស់លោកស្រី កាលពីថ្ងៃទី១៣ ខែឧសភា។

នៅក្នុងវីដេអូ ដែលបានចេញផ្សាយដោយអ្នកគាំទ្រកាលពីថ្ងៃអង្គារ លោកស្រី បានអរគុណ ចំពោះការគាំទ្រ និងការពិចារណា ដែលលោកស្រី ទទួលបានពីមនុស្សជាច្រើន។

អ្នកគាំទ្រ បាននិយាយថា លោកស្រីកំពុងស្នាក់នៅជាមួយក្រុមគ្រួសារ ប៉ុន្តែសិទ្ធសេរីភាព ត្រូវបានគេកំណត់។ ការអត្ថាធិប្បាយនេះ នាំឱ្យមានការសង្ស័យថា លោកស្រី កំពុងត្រូវបានអាជ្ញាធរ តាមដាននៅឡើយ។