ជនសង្ស័យនៅក្នុងរឿងក្ដីសម្លាប់មេដឹកនាំសាសនា Sikh លោក Hardeep Singh Nijjar ដែលមានឈ្មោះ Karan Brar, Kamal Preet Singh, Karan Preet Singh និង Amandeep Singh បានបង្ហាញខ្លួនជាមួយគ្នា នៅក្នុងបន្ទប់សវនាការ នៅទីក្រុង Surrey របស់ប្រទេសកាណាដា កាលពីថ្ងៃអង្គារ (ទី២១ ខែឧសភា)។ បុរស ៣នាក់ ក្នុងចំណោមអ្នកទាំងនោះ ដែលបច្ចុប្បន្នត្រូវបានឃុំខ្លួនក្នុងខេត្ត British Columbia ត្រូវបាននាំខ្លួនចូលទៅក្នុងបន្ទប់សវនាការដោយមានជាប់ខ្នោះដៃ ហើយអង្គុយនៅចំពោះមុខសមាជិកនៃក្រុម Gurdwara របស់អ្នកកាន់សាសនា Sikh។ ចំណែកជនជាប់ចោទ Amandeep Singh បានបង្ហាញខ្លួនតាមរយៈវីដេអូអនឡាញពីខេត្ត Ontario។ បុរសទាំង ៤នាក់ ត្រូវប្រឈមនឹងការចោទប្រកាន់ពីបទឃាតកម្ម និងសមគំនិត ក្នុងករណីប្រព្រឹត្តអំពើឃាតកម្ម។

អ្នកបកប្រែភាសា Punjabi (ប៉ាន់ចាប) បកប្រែការណែនាំរបស់តុលាការដល់ជនជាប់ចោទទាំងនោះ។ យោងតាមសារព័ត៌មានក្នុងស្រុកបានឲ្យដឹងថា ចៅក្រមបានបញ្ជាបុរសទាំងនោះមិនឲ្យទាក់ទងដល់បុគ្គលមានឈ្មោះក្នុងបញ្ជី ក្នុងរួមទាំងសមាជិកគ្រួសាររបស់លោក Nijjar ផងដែរ ហើយតម្រូវឲ្យពួកគេបញ្ជាក់ពីកម្រិតនៃការយល់របស់ពួកគេ ចំពោះការណែនាំទាំងនេះ។

អំឡុងការកាត់ក្ដីនេះ ឃើញថា មានអ្នកមើលពីសហគមន៍អ្នកកាន់សាសនា Sikh តិចជាងមុន បើប្រៀបធៀបទៅនឹងការបង្ហាញខ្លួនដំបូងរបស់ជនសង្ស័យទាំងនេះ ប៉ុន្តែទង់ជាតិ និងបដាតវ៉ាជាច្រើន នៅតែអាចត្រូវបានមើលឃើញនៅខាងក្រៅតុលាការ។ ក្នុងចំណោមការបង្ហាញការតវ៉ានោះ ក៏ឃើញមានរូបតុក្កតារបស់នាយករដ្ឋមន្ត្រីឥណ្ឌា លោក Narendra Modi ដែលមានសម្លៀកបំពាក់អ្នកទោស និងជាប់ខ្នោះដៃ។

លោក Moninder Singh អ្នកនាំពាក្យក្រុមប្រឹក្សា BC Gurdwara បានធ្វើសន្និសីទសារព័ត៌មានខ្លីមួយនៅខាងក្រៅតុលាការ ដោយបញ្ជាក់ថា ការមើលឃើញជនជាប់ចោទដោយផ្ទាល់ បាន និងកំពុងធ្វើឲ្យសកម្មឡើង សម្រាប់បុព្វហេតុរបស់ពួកគេ និងបានគូសបញ្ជាក់អំពីតម្រូវការនៃការទទួលខុសត្រូវ។

គួរបញ្ជាក់ថា កាលពីដើមខែនេះ នគរបាលកាណាដា បានចាប់ខ្លួន និងចោទប្រកាន់បុរសជនជាតិឥណ្ឌា ៤នាក់ ហើយបានប្រកាសថា ពួកគេកំពុងស៊ើបអង្កេតទំនាក់ទំនងដែលអាចមាន រវាងជនសង្ស័យ និងរដ្ឋាភិបាលឥណ្ឌា៕