រដ្ឋមន្ត្រីការបរទេសអាមេរិក លោក Antony Blinken កាលពីថ្ងៃអង្គារ (ទី២១ ខែឧសភា) បាននិយាយថា រដ្ឋបាលរបស់ប្រធានាធិបតី លោក Joe Biden មានឆន្ទៈក្នុងការធ្វើការជាមួយសភា ដើម្បីដាក់ទណ្ឌកម្មដែលអាចកើតមមាន ប្រឆាំងនឹងមន្ត្រីតុលាការឧក្រិដ្ឋកម្មអន្តរជាតិ (ICC) ជុំវិញសំណើរបស់រដ្ឋអាជ្ញា ដែលសុំឲ្យមានដីកាចាប់ខ្លួនមេដឹកនាំអ៊ីស្រាអែល ជុំវិញសង្គ្រាម នៅតំបន់ហ្កាហ្សា។

នៅឯសវនាការអនុគណៈកម្មាធិការត្រួតពិនិត្យរបស់ព្រឹទ្ធសភា សមាជិកព្រឹទ្ធសភាមកពីគណបក្សសាធារណរដ្ឋ លោក Lindsey Graham បានប្រាប់លោក Blinken ថា លោកចង់ឃើញការដាក់ទណ្ឌកម្មជាថ្មីរបស់សហរដ្ឋអាមេរិកលើតុលាការជាការឆ្លើយតបទៅនឹងចំណាត់ការ ដែលបានប្រកាសដោយរដ្ឋអាជ្ញារបស់ ICC លោក Karim Khan កាលពីថ្ងៃទី២០ ខែឧសភា។

លោក Graham បាននិយាយទៅកាន់លោក Blinken ថា៖ «ខ្ញុំចង់ធ្វើសកម្មភាព មិនមែនគ្រាន់តែជាពាក្យសម្ដីប៉ុណ្ណោះទេ។ តើអ្នកនឹងគាំទ្រកិច្ចខិតខំប្រឹងប្រែងទ្វេភាគី ក្នុងការដាក់ទណ្ឌកម្ម ICC មិនត្រឹមតែសម្រាប់ការបញ្ចេញកំហឹងឲ្យអ៊ីស្រាអែលប៉ុណ្ណោះទេ ប៉ុន្តែដើម្បីការពារផលប្រយោជន៍ផ្ទាល់ខ្លួនរបស់យើងនាពេលខាងមុខផងដែរ?»

ជាមួយនឹងសំណួររបស់លោក Graham នេះ លោក Blinken បានឆ្លើយតបយ៉ាងខ្លីថា៖ «ខ្ញុំស្វាគមន៍ការធ្វើការជាមួយអ្នក»។

គួរបញ្ជាក់ថា លោក Khan បាននិយាយនៅក្នុងការប្រកាសរបស់លោកថា លោកមានហេតុផលសមរម្យគ្រប់គ្រាន់ ក្នុងការជឿថា នាយករដ្ឋមន្ត្រីអ៊ីស្រាអែលលោក Benjamin Netanyahu ប្រមុខការពារជាតិអ៊ីស្រាអែល និងមេដឹកនាំក្រុមហាម៉ាសចំនួន ៣នាក់ «ត្រូវទទួលខុសត្រូវបទល្មើសព្រហ្មទណ្ឌ» ពីបទប្រព្រឹត្តឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ។

នៅដើមដំបូងនៃសវនាការ នាថ្ងៃទី២១ ខែឧសភា លោក Blinken បាននិយាយថា លោកនឹងធ្វើការជាមួយសភាលើការឆ្លើយតបដ៏សមស្របមួយ ដោយហៅចំណាត់ការរបស់ ICC ថា ជាទង្វើ «ខុសយ៉ាងខ្លាំង»។ លោក Blinken បាននិយាយថា វានឹងធ្វើឲ្យស្មុគស្មាញដល់ការរំពឹងទុកពីការឈានដល់កិច្ចព្រមព្រៀងដោះលែងចំណាប់ថ្នូរ និងមានបទឈប់បាញ់ នៅក្នុងជម្លោះរបស់អ៊ីស្រាអែលជាមួយក្រុមសកម្មប្រយុទ្ធហាម៉ាសប៉ាឡេស្ទីន៕