ក្រុមអ្នកសរសេរប្លុកស្នេហាជាតិរុស្ស៊ីនៅថ្ងៃពុធនេះ បានសម្តែងការខឹងសម្បាចំពោះការចាប់ខ្លួនអតីតមេបញ្ជាការកងទ័ពលេខ៥៨ របស់រុស្ស៊ី ដែលត្រូវបានឃុំខ្លួនពីបទក្លែងបន្លំ ហើយបានចាត់ទុកគាត់ជាឧត្តមសេនីយ៍មានទេពកោសល្យម្នាក់ ដែលមានភាពក្លាហានហ៊ាននិយាយការពិតទៅកាន់ថ្នាក់លើដែល              អសមត្ថភាព។

ទីភ្នាក់ងារព័ត៌មានរដ្ឋរបស់រុស្ស៊ី TASS បានរាយការណ៍កាលពីថ្ងៃអង្គារថា លោកឧត្តមសេនីយ៍ Ivan Popov ត្រូវបានចាប់ខ្លួនដោយសង្ស័យពីបទ«ក្លែងបន្លំទ្រង់ទ្រាយធំ» ។

ពុំអាចទាក់ទង លោក Popov ដោយផ្ទាល់បានទេ ហើយប្រព័ន្ធផ្សព្វផ្សាយរុស្ស៊ីនិយាយថា លោកត្រូវបានចោទប្រកាន់ពីបទលួចលោហៈធាតុមានតម្លៃចំនួន ១០០ លានរូប្លិ៍ (១,១លានដុល្លារ)។

បន្ទាប់ពីមានការបះបោរកាលពីខែមិថុនា ឆ្នាំ ២០២៣ ដោយក្រុមទាហានស៊ីឈ្នួល Wagner ប្រឆាំងនឹងការបង្កើតវិស័យការពារជាតិរបស់រុស្ស៊ី លោក Popov បាននិយាយថា ខ្លួនត្រូវបានគេបណ្តេញចេញ បន្ទាប់ពីបានប្រាប់ក្រុមមន្ត្រីជាន់ខ្ពស់អំពីស្ថានភាពដ៏អាក្រក់នៅជួរមុខ ក្នុងប្រទេសអ៊ុយក្រែន។

លោក Popov ដែលមានសញ្ញាហៅយោធាថា «Spartacus» ហើយដែលមានប្រជាប្រិយភាពជាមួយកងទ័ព បាននិយាយនៅពេលនោះ ទាហានរុស្ស៊ី ត្រូវបានគេចាក់នៅខាងក្រោយ ដោយសារតែការបរាជ័យរបស់មេបញ្ជាការជាន់ខ្ពស់របស់ពួកគេ។