គ្រួសារចំណាប់ថ្នូរអ៊ីស្រាអែល ដែលត្រូវបានក្រុមហាម៉ាស់ចាប់ខ្លួន ចាប់តាំងពីការវាយប្រហារកាលពីថ្ងៃទី ៧ ខែតុលា បានមកតវ៉ានៅទីក្រុង Tel Aviv និងទីក្រុងហ្សេរុយសាឡឹម កាលពីថ្ងៃពុធ ដោយបង្កើនសម្ពាធលើរដ្ឋាភិបាល ដើម្បីឈានដល់កិច្ចព្រមព្រៀងជាមួយក្រុមអ៊ីស្លាមនិយម ដែលគ្រប់គ្រងនៅតំបន់ហ្កាហ្សា។ ការតវ៉ានេះ ត្រូវបានធ្វើឡើងនៅខាងក្រៅទីបញ្ជាការការក្រសួងការពារជាតិ ជាកន្លែងដែលគណៈរដ្ឋមន្ត្រីសង្គ្រាមអ៊ីស្រាអែល កំពុងជួបប្រជុំគ្នា។

ទូរទស្សន៍អ៊ីស្រាអ៊ែល បានចាក់ផ្សាយវីដេអូដែលបានថតទុកកាលពីថ្ងៃពុធ នៃទាហានស្រីចំនួនប្រាំនាក់ ដែលត្រូវបានចាប់ពង្រត់ដោយខ្មាន់កាំភ្លើងក្រុមហាម៉ាស ក្នុងអំឡុងពេលការវាយឆ្មក់កាលពីថ្ងៃទី៧ ខែតុលា ដែលបង្កឱ្យមានសង្រ្គាមនៅតំបន់ហ្កាហ្សា។ ក្រុមគ្រួសារចំណាប់ខ្មាំង សង្ឃឹមថាវីដេអូនេះ នឹងបង្កើនសម្ពាធលើនាយករដ្ឋមន្ត្រី លោក Benjamin Netanyahu ដើម្បីព្រមព្រៀងបទឈប់បាញ់ជាមួយក្រុមក្រុមហាម៉ាស និងធានាបានការដោះលែងចំណាប់ខ្មាំង។ រដ្ឋាភិបាល បានមើលឃើញថាការចេញផ្សាយវីដេអូឃ្លីបខ្លីរយៈពេលបីនាទី ទៅកាន់ប្រព័ន្ធផ្សព្វផ្សាយជាតិ និងអន្តរជាតិ ជាឱកាសមួយដើម្បីជួយគៀងគរការគាំទ្រ។

អ៊ីស្រាអែល និយាយថា មនុស្ស ១.២០០នាក់ ត្រូវបានសម្លាប់ និងជាង២៥០នាក់ ត្រូវបានចាប់ពង្រត់នៅក្នុងការវាយប្រហារកាលពីថ្ងៃទី៧ ខែតុលា ដែលដឹកនាំដោយក្រុមហាម៉ាស។ អ៊ីស្រាអែល បានឆ្លើយតបដោយបើកការវាយលុកដើម្បីកម្ចាត់ក្រុមសកម្មប្រយុទ្ធអ៊ីស្លាមនិយម ដែលអាជ្ញាធរសុខាភិបាលតំបន់ហ្កាហ្សា និយាយថាប្រជាជនប៉ាឡេស្ទីនជាង ៣៥.០០០ នាក់ត្រូវបានសម្លាប់។ យោធាអ៊ីស្រាអែលនិយាយថា ទាហានអ៊ីស្រាអែល២៨៦នាក់ ក៏ត្រូវបានសម្លាប់ផងដែរ។

រដ្ឋាភិបាលរបស់លោក Netanyahu និយាយថា ការបន្តសម្ពាធយោធា នឹងបង្ខំក្រុមហាម៉ាសឲ្យទទួល លទ្ធផលដែលខ្លួនបានធ្វើ។ គ្រួសារចំណាប់ខ្មាំង ព្រួយបារម្ភថា មនុស្សជាទីស្រឡាញ់របស់ខ្លួនអាចបាត់បងជីវិត ហើយចំណាប់ខ្មាំងជាស្ត្រីអាចត្រូវបានគេចាប់រំលោភ។ ប៉ុន្តែក្រុមហាម៉ាស បានបដិសេធការចោទប្រកាន់ពីបទរំលោភបំពានផ្លូវភេទ ធ្វើឡើងដោយក្រុមរបស់ខ្លួន។