អាជ្ញាធរសុខាភិបាលក្នុងតំបន់ បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធ (២២ ឧសភា) ថា ចំនួនអ្នកស្លាប់របស់ប៉ាឡេស្ទីន ពីការវាយប្រហាររបស់អ៊ីស្រាអែល ដែលកំពុងបន្តនៅតំបន់ហ្កាហ្សាស្ទ្រីប បានកើនឡើងដល់ ៣៥.៧០៩ នាក់ និងអ្នករបួសដល់ ៧៩.៩៩០ នាក់។ ក្នុងរយៈពេល ២៤ ម៉ោងកន្លងមកនេះ កងទ័ពអ៊ីស្រាអែល បានសម្លាប់ជនជាតិប៉ាឡេស្ទីន ចំនួន ៦២ នាក់ និង ១៣៨ នាក់ផ្សេងទៀតរងរបួស។

អាជ្ញាធរសុខាភិបាលបានសង្កត់ធ្ងន់ថា ជនរងគ្រោះជាច្រើននៅតែត្រូវបានកប់នៅក្រោមគំនរបាក់បែក ព្រោះពិបាកសម្រាប់អ្នកជួយសង្គ្រោះក្នុងការទៅដល់ពួកគេ។

កាលពីថ្ងៃពុធផងដែរ ការិយាល័យប្រព័ន្ធផ្សព្វផ្សាយនៅតំបន់ហ្កាហ្សាស្ទ្រីប បានប្រកាសថា សេវាវេជ្ជសាស្រ្តនៅភាគខាងជើងហ្កាហ្សា ត្រូវបានរំខានទាំងស្រុងបន្ទាប់ពីមន្ទីរពេទ្យ ខាម៉ាស អាដវ៉ាន់ (Kamal Adwan) បានឈប់ដំណើរការ ហើយមន្ទីរពេទ្យ អាល់ អាវដា (Al-Awda) ត្រូវបានឡោមព័ទ្ធ និងបិទសេវាកម្មអស់រយៈពេល ៤ ថ្ងៃជាមួយនឹងការបញ្ឈប់ការថែទាំផ្សេងៗ។

ការផ្អាកសេវាសុខភាពមានន័យថា ជាមហន្តរាយមនុស្សធម៌ដែលកំពុងកើតមាន ដែលប៉ះពាល់ដល់មនុស្ស ៧០០.០០០ នាក់។ សេចក្តីថ្លែងការណ៍នោះបានអំពាវនាវឱ្យមានការបង្កើតមន្ទីរពេទ្យបណ្ដោះអាសន្ន ការចូលជាបន្ទាន់នៃក្រុមវេជ្ជសាស្រ្ដ ការផ្គត់ផ្គង់ថ្នាំ និងប្រេងឥន្ធនៈ ដើម្បីធានាបាននូវការផ្តល់សេវាវេជ្ជសាស្រ្តកម្រិតសមរម្យជាអប្បបរមា៕