បាល់បោះ៖ ក្រុមបាល់បោះសហរដ្ឋអាមេរិកចាប់ផ្ដើមមិនបានល្អ តាមវាយបកយកឈ្នះអូស្ត្រាលីឡើងវគ្គផ្ដាច់ព្រ័ត្រដណ្ដើមមេដាយមាសអូឡាំពិក ៤ព្រឹត្តិការណ៍ជាប់គ្នា។ អូស្ត្រាលីជាក្រុមចាប់ផ្តើមបានល្អជាងដោយនាំមុខ ១៥ពិន្ទុនៅវគ្គទី២ មុនពេលឈានដល់វគ្គទី៣ ទើបក្រុមការពារជើងឯក ៣ព្រឹត្តិការណ៍ជាប់គ្នា អាមេរិកវាយបកមកវិញរហូតយកឈ្នះនៅទីបញ្ចប់ ៩៧-៧៨។
កីឡាករសំខាន់ ២រូបគឺជាតួអង្គសំខាន់ក្នុងការវាយបកយកឈ្នះនេះដែលរួមមាន Kevin Durant រកបាន ២៣ពិន្ទុ និង Devin Booker រកបាន ២០ពិន្ទុ។ Kevin Durant មុនមកដល់វគ្គនេះក៏រកបាន ២៩ពិន្ទុផងដែរពេលយកឈ្នះអេស្ប៉ាញនៅវគ្គ ៨ក្រុមចុងក្រោយ។ សូមបញ្ជាក់ថា ក្នុងប្រវត្តិសាស្ត្រកីឡាបាល់បោះនៅអូឡាំពិក មានតែអាមេរិកទេឈ្នះមេដាយមាសច្រើនជាងគេសរុប ១៤លើកតាំងពីអូឡាំពិកដំបូងនៅឆ្នាំ១៩៣៦។ តាំងពីអតីតសហភាពសូវៀតឈ្នះមេដាយមាសនៅឆ្នាំ១៩៨៤ អាមេរិកបានឈ្នះមេដាយមាស ៣ព្រឹត្តិការណ៍ជាប់គ្នាមុនពេលអាហ្សង់ទីនឈ្នះម្តងនៅឆ្នាំ២០០៤ នៅទីក្រុងអាតែនប្រទេសក្រិក បន្ទាប់មកអាមេរិកឈ្នះមេដាយមាស ៣ព្រឹត្តិការណ៍ជាប់គ្នាទៀត។
ងាកមកការប្រកួតវគ្គពាក់កណ្តាលផ្តាច់ព្រ័ត្រមួយគូទៀត បារាំងបានយកឈ្នះស្លូវេនីយ៉ាងប្រផិតប្រផើយ ៩០-៨៩ ដែលធ្វើឱ្យបារាំងឡើងវគ្គផ្តាច់ព្រ័ត្រ ដណ្តើមមេដាយមាសជាលើកដំបូងតាំងពីចុងក្រោយនៅអូឡាំពិកឆ្នាំ២០០០ ទីក្រុងស៊ីដនីប្រទេសអូស្ត្រាលី៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
