ភ្នំពេញ ៖ ឯកឧត្តមទេសរដ្ឋមន្រ្តី លី ធុជ បានជំរុញឱ្យក្រសួង-ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ បន្តអនុវត្តន៍នូវអនុសាសន៍ណែនាំដ៏ខ្ពង់ខ្ពស់របស់សម្តេចធិបតី ក្នុងការប្តេជ្ញាចិត្ត និងកិច្ចខិតខំប្រឹងប្រែងក្នុងការបន្តបោសសម្អាតមីន និងសំណល់ជាតិផ្ទុះពីសង្រ្គាម ដើម្បីធានាសុវត្ថិភាពរបស់ប្រជាជន និងរួមចំណែកអភិវឌ្ឍជាតិ

​ការជម្រុញបែបនេះក្នុងខណះ ឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន ដឹកនាំកិច្ចប្រជុំស្តីពីបច្ចុប្បន្នភាពស្ថានភាពសកម្មភាពមីននៅកម្ពុជា ដើម្បីឆ្ពោះទៅរកកម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះពីសង្រ្គាម នៅវេលារសៀលថ្ងៃទី២៣ ខែឧសភា ឆ្នាំ ២០២៤ នេះ នៅទីស្នាក់ការអាជ្ញាធរមីន ដោយមានការចូលរួមពីតំណាងក្រសួង-ស្ថាប័នពាក់ព័ន្ធ គណៈកម្មា ធិការសកម្មភាពមីនខេត្ត(ភីម៉ាក់) និងក្រុមការងាររៀប ចំផែនការសកម្មភាពមីន(ម៉ាពូ) ។

ឯកឧត្តមទេសរដ្ឋមន្រ្តី បានលើកឡើងថា រាជរដ្ឋាភិបាលអាណត្តិទី៧ ក្រោមការដឹកនាំប្រកបដោយចក្ខុវិស័យវែងឆ្ងាយរបស់សម្តេចធិបតី នាយករដ្ឋមន្រ្តី បានធ្វើការប្តេជ្ញាចិត្តខ្ពស់ «ឆ្ពោះទៅរកកម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះពីសង្រ្គាម» (Toward a Mine/ERW-Impact-Free Cambodia)។ រាជរដ្ឋាភិបាលកម្ពុជា នឹងបន្តកិច្ចខិតខំប្រឹងប្រែងក្នុងការបោសសម្អាតមីន និងសំណល់ជាតិផ្ទុះពីសង្គ្រាម និងដោះស្រាយផលប៉ះពាល់រយៈពេលវែង ដែលបង្កដោយមីន/សំណល់ជាតិផ្ទុះពីសង្គ្រាម រួមមាន កិច្ច សង្គ្រោះជនរងគ្រោះ ការជួយដល់ប្រជាពលរដ្ឋ និងសហគមន៍ដែលរងការធ្វើបម្លាស់ទី និងការស្តារសេដ្ឋកិច្ច-សង្គម ក្នុងតំបន់ដែលធ្លាប់រងការគំរាមកំហែងដោយសារមីន/សំណល់ជាតិផ្ទុះពីសង្គ្រាម។ បន្ថែមពីនេះឯកឧត្តមទេសរដ្ឋមន្រ្តី ក៏បានជំរុញឱ្យក្រសួង-ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ បន្តអនុវត្តន៍នូវអនុសាសន៍ណែនាំដ៏ខ្ពង់ខ្ពស់របស់សម្តេចធិបតី ក្នុងការប្តេជ្ញាចិត្ត និងកិច្ចខិតខំប្រឹងប្រែងក្នុងការបន្តបោសសម្អាតមីន និងសំណល់ជាតិផ្ទុះពីសង្រ្គាម ដើម្បីធានាសុវត្ថិភាពរបស់ប្រជាជន និងរួមចំណែកអភិវឌ្ឍជាតិ។

តាងនាមសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន ឯកឧត្តមទេសរដ្ឋមន្រ្តី បានថ្លែងអំណរគុណជូនចំពោះក្រសួង-ស្ថាប័នពាក់ព័ន្ធ ដែលតែងតែធ្វើការផ្សព្វផ្សាយអំពីកិច្ចខិតខំប្រឹងប្រែង និងសមិទ្ធផលរបស់រាជរដ្ឋាភិបាលក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាម ក៏ដូចជាយកចិត្តទុកដាក់ និងចាត់ទុកការងារបោសសម្អាតមីន ជាការងារអាទិភាពមួយរបស់ខ្លួន។ ជាមួយគ្នានោះ ឯកឧត្តមទេសរដ្ឋមន្រ្តី បានកោតសរសើរប្រកបដោយការវាយតម្លៃខ្ពស់ដល់រដ្ឋបាលរាជធានី-ខេត្ត ដែលតែងតែផ្តល់នូវការដឹកនាំ សហការ និងសម្របសម្រួលសកម្មភាពមីននៅតាមភូមិសាស្រ្តរបស់ខ្លួន ដើម្បីផ្តល់លក្ខណៈងាយស្រួល និងជំរុញឱ្យការបោសសម្អាតមីន/គ្រាប់ទទួលបានជោគជ័យ៕ អត្ថបទ ៖ ភារម្យ