អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova បាននិយាយកាលពីថ្ងៃព្រហស្បតិ៍ថា៖    «សហភាពអឺរ៉ុបនឹងគិតថា មាន«វិធានការពេញលេញ»នៃការសងសឹករបស់រុស្ស៊ីលើផែនការរបស់ខ្លួនក្នុងការប្រើប្រាស់ប្រាក់ចំណូលពីទ្រព្យសម្បត្តិរបស់រុស្ស៊ីដែលបានបង្កក ដើម្បីជួយអ៊ុយក្រែន។  

រដ្ឋាភិបាលបែលហ្ស៊ិក បាននិយាយកាលពីថ្ងៃអង្គារថា បណ្តាប្រទេសសហភាពអឺរ៉ុប បានអនុម័តជាផ្លូវការនូវផែនការមួយ ដើម្បីប្រើប្រាស់ប្រាក់ចំណេញពីទ្រព្យសម្បត្តិរបស់ធនាគារកណ្តាលរបស់រុស្ស៊ី ដែលត្រូវបានបង្កក នៅក្នុងសហភាពអឺរ៉ុបសម្រាប់ជួយដល់ការការពារប្រទេសអ៊ុយក្រែន។

ប្រទេសរុស្ស៊ីនិយាយថា ចំណាត់ការបែបនេះ គឺខុសច្បាប់ និងបំផ្លាញមូលដ្ឋានគ្រឹះនៃប្រព័ន្ធហិរញ្ញវត្ថុពិភពលោក។

អ្នកស្រី Zakharova បានប្រាប់អ្នកយកព័ត៌មានថា៖«យើងកំពុងនិយាយអំពីការប៉ុនប៉ងមួយផ្សេងទៀតដើម្បីធ្វើឲ្យស្របច្បាប់ការលួចនៅកម្រិតរដ្ឋ» ដោយនិយាយថា សហភាពអឺរ៉ុប បានបង្ហាញថា វាមិនអាចត្រូវបានចាត់ទុកថា ជាយុត្តាធិការដែលអាចទុកចិត្តបានសម្រាប់វិនិយោគិនទេ។

រដ្ឋមន្ត្រីក្រសួងរតនាគារសហរដ្ឋអាមេរិក លោកស្រី Janet Yellen បាននិយាយកាលពីថ្ងៃព្រហស្បតិ៍ថា ទ្រព្យសម្បត្តិរបស់រុស្ស៊ីដែលជាប់គាំង គឺជាប្រភពនៃការគាំទ្រដ៏សំខាន់សម្រាប់អ៊ុយក្រែនរហូតដល់ឆ្នាំ ២០២៥ និងលើសពីនេះ។

ក្រុមអ្នកចរចានៃប្រទេស G7 បានពិភាក្សាជាច្រើនសប្តាហ៍អំពីរបៀបទាញយកផលប្រយោជន៍ពីទ្រព្យសម្បត្តិហិរញ្ញវត្ថុរបស់រុស្ស៊ីដែលមានតម្លៃ ៣០០ ពាន់លានដុល្លារ ដូចជារូបិយប័ណ្ណសំខាន់ៗ និងមូលធនបត្ររបស់រដ្ឋាភិបាលដែលត្រូវបានបង្កកភ្លាមៗ បន្ទាប់ពីទីក្រុងមូស្គូបានឈ្លានពានអ៊ុយក្រែន ក្នុងខែកុម្ភៈ ឆ្នាំ ២០២២។