នាយករដ្ឋមន្ត្រីហុងគ្រី លោក វីកទ័រ អ័របាន (Viktor Orban) បាននិយាយនៅថ្ងៃសុក្រនេះថា ការភ័យខ្លាចថា រុស្ស៊ីនឹងធ្វើការវាយប្រហារលើសមាជិកណាតូណាមួយ គឺគ្មានមូលដ្ឋានច្បាស់លាស់ ដោយបន្ថែមថា សង្រ្គាមនៅអ៊ុយក្រែនដែលពេលនេះ ឈានចូលដល់ឆ្នាំទី៣ហើយ បង្ហាញពីដែនកំណត់នៃសមត្ថភាពរបស់រុស្ស៊ី។

ប្រទេសហុងគ្រី ដែលជាសមាជិកនៃសហភាពអឺរ៉ុប និងអង្គការណាតូ បានបដិសេធមិនផ្តល់ជំនួយយោធាដល់អ៊ុយក្រែន ចាប់តាំងពីការឈ្លានពានពេញទំហឹងបស់រុស្ស៊ី ក្នុងខែកុម្ភៈ ឆ្នាំ ២០២២។ ទីក្រុងប៊ុយដា   ប៉ែស ក៏ស្វែងរកការដកខ្លួនចេញពីផែនការរយៈពេលវែងរបស់អង្គការណាតូ ក្នុងការផ្តល់ជំនួយដល់អ៊ុយក្រែន ដោយមួយនឹងរដ្ឋមន្ត្រីការបរទេសរបស់ខ្លួនបានហៅការផ្តល់ជំនួយនេះថា ជា«បេសកកម្មខ្វះការពិចារណា»។

លោក អ័របាន ជាអ្នកជាត់និយមម្នា្កក់ ដែលកាន់អំណាចតាំងពីឆ្នាំ ២០១០ បានកសាងយុទ្ធនាការរបស់ខ្លួន សម្រាប់ការបោះឆ្នោតសភាអឺរ៉ុប នៅខែក្រោយក្នុងរបៀបវារៈនៃការជៀសវាងការជាប់ពាក់ព័ន្ធកាន់តែជ្រៅនៅក្នុងជម្លោះ ដោយនិយាយថា ការបោះឆ្នោតនេះ អាចកំណត់ដំណើរនៃសង្រ្គាម និងសន្តិភាពនៅអឺ  រ៉ុប។

លោក បានប្រាប់វិទ្យុសាធារណៈក្នុងបទសម្ភាសន៍មួយថា៖«យោធារុស្ស៊ី កំពុងប្រយុទ្ធនឹងសង្រ្គាមដ៏ធ្ងន់ធ្ងរ និងលំបាកជាមួយអ៊ុយក្រែន» «ប្រសិនបើជនជាតិរុស្ស៊ីខ្លាំងគ្រប់គ្រាន់ ដើម្បីផ្តួលជនជាតិអ៊ុយក្រែន ក្នុងពេលតែមួយ ពួកគេនឹងធ្វើដូច្នេះ រួចទៅហើយ»។

លោកនាយករដ្ឋមន្ត្រីហុងគ្រីរូបនេះ បានបញ្ជាក់ផងដែរថា សមត្ថភាពយោធារបស់ណាតូ គឺលើសពីអ៊ុយក្រែន ដូច្នេះហើយ វាមិនទំនងថា រុស្ស៊ី ឬប្រទេសណាមួយ នឹងធ្វើការវាយប្រហារប្រឆាំងអង្គការណាតូនោះទេ។