ភ្លៀងធ្លាក់ខ្លាំងម្តងទៀត បានវាយលុកផ្នែកខ្លះនៃរដ្ឋភាគខាងត្បូងរបស់ប្រទេសប្រេស៊ីល កាលពីថ្ងៃព្រហស្បតិ៍ (ទី២៣ ខែឧសភា) ដោយបំផ្លាញកិច្ចខិតខំប្រឹងប្រែងសម្អាតរយៈពេលជាច្រើនថ្ងៃ និងបង្កជាទឹកជំនន់ដល់តំបន់ ដែលពីមុនមិនត្រូវបានប៉ះពាល់ នៅក្នុងរដ្ឋធានី Porto Alegre។

ទឹកជំនន់ជាកំណត់ត្រាក្នុងរយៈពេលមួយខែកន្លងមកនេះ បានបណ្តាលឲ្យមនុស្ស ១៦៣នាក់ស្លាប់ និងមានការជម្លៀសមនុស្សប្រហែល ៦០ម៉ឺននាក់ទៀត។ មនុស្ស ៦៤នាក់ផ្សេងទៀត កំពុងបាត់ខ្លួន។

ភ្លៀងធ្លាក់បានថមថយក្នុងរយៈពេលប៉ុន្មានថ្ងៃកន្លងមកនេះ ដោយហាងចាប់ផ្ដើមបើកវិញបណ្ដើរៗ ហើយអ្នកស្រុកកំពុងធ្វើការសាងសង់ឡើងវិញ។ ប៉ុន្តែមេឃ បានចាប់ផ្តើមអាប់អួ នាព្រឹកថ្ងៃព្រហស្បតិ៍ ដោយបានបង្កឲ្យមានភ្លៀងធ្លាក់ខ្លាំង និងទឹកជំនន់ នៅតំបន់នានានៃទីក្រុង Porto Alegre ជាថ្មីម្តងទៀត។

មជ្ឈមណ្ឌលថែទាំកុមារមួយនៅក្នុងសង្កាត់ Menino Deus ដែលបានបើកដំណើរការឡើងវិញ កាលពីថ្ងៃពុធ បន្ទាប់ពីសម្អាតរយៈពេលមួយសប្តាហ៍ ត្រូវបានបង្ខំឲ្យជម្លៀសចេញ នៅពេលដែលភ្លៀងធ្លាក់យ៉ាងខ្លាំងនោះ។

នាយកមជ្ឈមណ្ឌលថែទាំកុមារដែលមិនបានប្រាប់ឈ្មោះ បាននិយាយថា៖«វាបានកើតឡើងយ៉ាងលឿន (ទឹកជំនន់ បានកើតឡើង) លឿនជាងលើកមុនទៅទៀត»។

ក្នុងរយៈពេល ១២ម៉ោង ផ្នែកខ្លះនៃទីក្រុង Porto Alegre បានមាននូវភ្លៀងធ្លាក់ច្រើនជាងធម្មតា ពោលគឺច្រើនជាងក្នុងរយៈពេលពេញមួយខែទៅទៀត។ នេះបើយោងតាមទិន្នន័យពីវិទ្យាស្ថានឧតុនិយមជាតិ៕