រដ្ឋមន្ត្រីការបរទេសអ៊ីស្រាអែល លោក Israel Katz នៅថ្ងៃសុក្រ (ទី២៤ ខែឧសភា) នេះ បាននិយាយថា ប្រទេសរបស់លោក នឹងរារាំងស្ថានកុងស៊ុលអេស្ប៉ាញ នៅទីក្រុងហ៊្សេរុយសាឡឹម មិនឲ្យផ្តល់សេវានានាដល់ប្រជាជនប៉ាឡេស្ទីន នៅតំបន់កាន់កាប់វ៉េសប៊ែង បន្ទាប់ពីមានការសម្រេចរបស់ទីក្រុងម៉ាឌ្រីដ នៅសប្តាហ៍នេះ ក្នុងការទទួលស្គាល់រដ្ឋប៉ាឡេស្ទីន។

ចំណាត់ការនេះគឺជាជំហានចុងក្រោយបង្អស់ ក្នុងការប្រឈមមុខដាក់គ្នាយ៉ាងខ្លាំងក្លា រវាងអ៊ីស្រាអែល និងអេស្ប៉ាញ ដែលបានចូលរួមជាមួយអៀរឡង់ និងន័រវ៉ែល ដើម្បីប្រកាសថា ខ្លួនបានទទួលស្គាល់ប៉ាឡេស្ទីនជាផ្នែកនៃកិច្ចខិតខំប្រឹងប្រែង ដើម្បីដាក់សម្ពាធលើអ៊ីស្រាអែលឲ្យបញ្ចប់សង្រ្គាម នៅតំបន់ហ្កាហ្សា ជាកន្លែងដែលយុទ្ធនាការរបស់អ៊ីស្រាអែល បានសម្លាប់មនុស្សច្រើនជាង ៣៥.០០០នាក់។

អ៊ីស្រាអែលបានច្រានចោលវិធានការនេះ ដោយចោទប្រកាន់ប្រទេសអ៊ឺរ៉ុបទាំង៣ ថា បានផ្តល់រង្វាន់ដល់ក្រុមហាម៉ាស សម្រាប់ការវាយប្រហារដ៏សាហាវរបស់ក្រុមសកម្មប្រយុទ្ធមួយនេះលើអ៊ីស្រាអែល កាលពីថ្ងៃទី៧ ខែតុលា ដែលបានសម្លាប់ជនជាតិអ៊ីស្រាអែល និងជនបរទេសប្រហែល ១.២០០នាក់ និងបានឃើញមនុស្សប្រហែល ២៥០នាក់ ត្រូវបានចាប់ខ្លួននាំទៅតំបន់ហ្កាហ្សា។

លោក Katz មានការខឹងសម្បាជាពិសេស ចំពោះអ្វីដែលលោកបានពណ៌នាថា ជាការអត្ថាធិប្បាយស្អប់ជនជាតិជីហ្វនិយមពីរដ្ឋមន្ត្រីការងាររបស់អេស្ប៉ាញ លោកស្រី Yolanda Diaz ដែលបានប្រើពាក្យថា «ប៉ាឡេស្ទីននឹងចេញពីទន្លេទៅកាន់សមុទ្រ» នៅក្នុងវីដេអូដែលបានបង្ហោះនៅលើបណ្ដាញសង្គម X នាសប្តាហ៍នេះ៕