កុមារជាង ៣០០លាននាក់ ក្នុង ១ឆ្នាំ គឺជាជនរងគ្រោះនៃការកេងប្រវ័ញ្ចផ្លូវភេទ និងការរំលោភបំពាន តាមប្រព័ន្ធអ៊ីនធឺណិត។ នេះបើយោងតាមការប៉ាន់ប្រមាណជាសកលដំបូងពីទំហំនៃបញ្ហាដែលបានចេញផ្សាយ នៅថ្ងៃចន្ទ (ទី២៧ ខែឧសភា) នេះ។

អ្នកស្រាវជ្រាវ នៅសកលវិទ្យាល័យ Edinburgh បានរកឃើញថា កុមារម្នាក់ ក្នុងចំណោម ៨នាក់ នៅលើពិភពលោក បានក្លាយជាជនរងគ្រោះនៃការថតរូប និងវីដេអូផ្លូវភេទ ដោយមិនមានការយល់ព្រម ព្រមទាំងការចែករំលែក និងផ្សព្វផ្សាយជាសាធារណៈនូវខ្លឹមសារបែបនេះ ក្នុងរយៈពេល ១២ខែកន្លងមកនេះ។

វិទ្យាស្ថានសុវត្ថិភាពកុមារសកលរបស់សាកលវិទ្យាល័យនេះ គឺវិទ្យាស្ថានពន្លឺកុមារ (Childlight Global Child Safety Institute) ដែលធ្វើការសិក្សាជ្រាវជ្រាវនេះ បានឲ្យដឹងថា ចំនួននេះមានចំនួនយុវជនប្រហែល ៣០២លាននាក់។ យោងតាមការសិក្សារនោះ បានឲ្យដឹងថា មានករណីស្នើសុំឲ្យធ្វើនេះធ្វើនោះជាច្រើន ដូចជាការសុំឲ្យផ្ញើរូបភាពអាក្រាតដោយមិនមានការស្ម័គ្រចិត្ត និងការស្នើសុំឲ្យមានសកម្មភាពផ្លូវភេទពីក្រុមមនុស្សពេញវ័យ និងយុវជនផ្សេងទៀត។

បទល្មើសទាំងនោះ មានចាប់ពីអ្វីដែលគេហៅថា ការគំរាមកំហែង ដែលជនល្មើសទាមទារប្រាក់ពីជនរងគ្រោះ ជាថ្នូរនឹងការរក្សារូបភាពឯកជន រហូតដល់ការបំពានបច្ចេកវិទ្យាបញ្ញាសិប្បនិម្មិត ដើម្បីបង្កើតវីដេអូ និងរូបភាពក្លែងក្លាយ។

បញ្ហានេះកើតមាននៅទូទាំងពិភពលោក ប៉ុន្តែការស្រាវជ្រាវ បានបង្ហាញថា សហរដ្ឋអាមេរិក គឺជាតំបន់ដែលមានហានិភ័យខ្ពស់ ដោយបុរសម្នាក់ ក្នុងចំណោម ៩នាក់ នៅទីនោះ បានសារភាពពីការប្រព្រឹត្តិបទល្មើសតាមអ៊ីនធឺណិត ចំពោះកុមារ នៅចំណុចមិនគប្បីណាមួយ៕