កូរ៉េខាងជើង នៅថ្ងៃចន្ទ (ទី២៧ ខែឧសភា) នេះ បានថ្កោលទោសកូរ៉េខាងត្បូង ជប៉ុន និងចិន ជុំវិញការប្តេជ្ញាចិត្ត ចំពោះការរំសាយអាវុធនុយក្លេអ៊ែរ នៅឧបទ្វីបកូរ៉េ អំឡុងកិច្ចប្រជុំកំពូលដ៏កម្រ នៅទីក្រុងសេអ៊ូល ដោយបានហៅសេចក្តីប្រកាសរួមថា ជា «ការបង្កហេតុផ្នែកនយោបាយ និងការរំលោភអធិបតេយ្យភាពធ្ងន់ធ្ងរ»។

អ្នកនាំពាក្យក្រសួងការបរទេសកូរ៉េខាងជើង បានឲ្យដឹងតាមប្រព័ន្ធផ្សព្វផ្សាយរដ្ឋថា៖ «ការពិភាក្សាអំពីការរំសាយអាវុធនុយក្លេអ៊ែរ នៅឧបទ្វីបកូរ៉េថ្ងៃនេះ គឺជាការបង្កហេតុខាងនយោបាយយ៉ាងធ្ងន់ធ្ងរ និងការរំលោភលើអធិបតេយ្យភាព ដែលបដិសេធទាំងស្រុងនូវអធិបតេយ្យភាព និងរដ្ឋធម្មនុញ្ញដែលមិនអាចរំលោភបានរបស់សាធារណរដ្ឋប្រជាមានិតប្រជាធិបតេយ្យកូរ៉េ ដែលឆ្លុះបញ្ចាំងពីឆន្ទៈឯកច្ឆន្ទរបស់ប្រជាជនកូរ៉េទាំងអស់»។

គួរបញ្ជាក់ថា ប្រទេសចិន ជប៉ុន និងកូរ៉េខាងត្បូង បានស្វែងរកកិច្ចសហប្រតិបត្តិការលើសន្តិសុខ នៅក្នុងកិច្ចប្រជុំកំពូលបីផ្លូវជាលើកដំបូងរបស់ពួកគេ គិតចាប់តាំងពីឆ្នាំ២០១៩ នៅទីក្រុងសេអ៊ូល នាថ្ងៃចន្ទនេះ ដែលពួកគេ «បានអះអាងឡើងវិញនូវជំហរស្តីពីសន្តិភាព និងស្ថិរភាពក្នុងតំបន់ ពោលគឺការរំសាយអាវុធនុយក្លេអ៊ែរនៅឧបទ្វីបកូរ៉េ»។ នេះបើតាមការបង្ហាញនៅសេចក្តីថ្លែងការណ៍រួមដែលបានចេញផ្សាយបន្ទាប់ពីកិច្ចប្រជុំកំពូលនោះ។

នាយករដ្ឋមន្ត្រីចិនលោក Li Qiang មិនបានបញ្ចេញមតិរិះគន់កូរ៉េខាងជើងទេ ប៉ុន្តែបានអំពាវនាវឲ្យភាគីទាំងអស់ កាត់បន្ថយភាពតានតឹង។ ចំណែកប្រធានាធិបតីកូរ៉េខាងត្បូងលោក Yoon Suk Yeol និងនាយករដ្ឋមន្ត្រីជប៉ុនលោក Fumio Kishida បានជំរុញឲ្យទីក្រុងព្យុងយ៉ាងលុបចោលផែនការរបស់ខ្លួនក្នុងការបាញ់បង្ហោះផ្កាយរណបចារកម្មទី២ ទៅកាន់គន្លងតារាវិថី។

កូរ៉េខាងជើងបានផ្តល់ការជូនដំណឹងថា ខ្លួនគ្រោងនឹងបាញ់បង្ហោះរ៉ុក្កែត នៅថ្ងៃទី៤ ខែមិថុនា ដើម្បីដាក់ពង្រាយផ្កាយរណប៕