រដ្ឋាភិបាល និងមន្ទីរពេទ្យ នៅថ្ងៃចន្ទ (ទី២៧ ខែឧសភា) នេះ បាននិយាយថា ស្ថានភាពរបស់នាយករដ្ឋមន្ត្រីស្លូវ៉ាគី លោក Robert Fico គឺកាន់តែប្រសើរឡើងហើយ បន្ទាប់ពីមានការប៉ុនប៉ងធ្វើឃាត កាលពីដើមខែនេះ។

សូមបញ្ជាក់ថា ខ្មាន់កាំភ្លើងម្នាក់ បានវាយប្រហារលោក Fico ដោយបាញ់ចំនួន ៤គ្រាប់ ក្នុងទីតាំងដ៏កៀក នៅពេលដែលនាយករដ្ឋមន្ត្រី បានស្វាគមន៍អ្នកគាំទ្រ នៅឯកិច្ចប្រជុំរដ្ឋាភិបាលមួយ នៅកណ្តាលទីក្រុង Handlova នៃប្រទេសស្លូវ៉ាគី កាលពីថ្ងៃទី១៥ ខែឧសភា។

លោក Fico វ័យ ៥៩ឆ្នាំ ត្រូវបានបាញ់ចំត្រង់ពោះ ហើយត្រូវបានគេបញ្ជូនទៅមន្ទីរពេទ្យ ក្នុងរដ្ឋធានីក្នុងតំបន់ Banska Bystrica ដោយមានស្ថានភាពធ្ងន់ធ្ងរ។ លោកបានទទួលការវះកាត់រយៈពេលជាងប្រាំម៉ោងភ្លាមៗ និងក្រោយមក បន្ថែមរយៈពេល ២ថ្ងៃទៀត។ តាមរយៈការធ្វើបច្ចុប្បន្នភាពព័ត៌មានប្រចាំថ្ងៃ មន្ទីរពេទ្យសាកលវិទ្យាល័យ F.D. Roosevelt បានឲ្យដឹងថា លោកចាប់ផ្ដើមគ្រាន់បើឡើងជាលំដាប់ ចាប់តាំងពីពេលនោះមក ហើយការពិនិត្យបានបញ្ជាក់ពីស្ថានភាពល្អប្រសើរនោះ នៅថ្ងៃចន្ទនេះ។

ដោយមិនមានព័ត៌មានលម្អិតបន្ថែម រដ្ឋាភិបាលបានប្រាប់ថា៖ «ផ្អែកលើលទ្ធផលនៃការពិនិត្យ កិច្ចប្រជុំក្រុមប្រឹក្សាវេជ្ជសាស្ត្រថ្ងៃនេះ បានបញ្ជាក់ពីភាពប្រសើរឡើងបន្តិចម្តងៗនៃស្ថានភាពសុខភាពរបស់លោកនាយករដ្ឋមន្ត្រី»៕